Ўзбекистоннинг уч ҳудудида ноқонуний ер сотилиши ҳолатлари аниқланди

Ўзбекистоннинг уч ҳудудида: Наманган, Андижон ва Қашқадарё вилоятларида  ноқонуний ер сотилиши ҳолатлари аниқланди. Бу ҳақда Иқтисодий жиноятларга қарши курашиш департаменти ахборот хизмати хабар берди. 

Хабарга кўра, ҳолатлардан бири Бош прокуратура ҳузуридаги департаментнинг Мингбулоқ туман бўлими томонидан ДХХ ва ИИБ ходимлари билан ҳамкорликда ўтказилган тадбирда аниқланган. Фуқаро А.Қ. ва бошқалар Ф.Т.нинг ишончига кириб, унга танишлари ёрдамида 140 миллион сўм эвазига туман ҳудудидан захирадаги 2 гектар ер майдонини расмийлаштириб олиб беришини ваъда қилган. Олдиндан 100 миллион сўмни олган вақтида ашёвий далиллар билан ушланган.

Худди шундай департамент ҳамда ДХХнинг Шаҳрихон тумани бўлимлари томонидан ўтказилган тезкор тадбирда фуқаро М.Х. фуқаро А.Б.га “Полосон” МФЙ ҳудудидан 8 сотих ер майдонини расмийлаштириб олиб бериш эвазига 6500 АҚШ долларини олган вақтида ашёвий далиллар билан ушланган.

Департаментнинг Деҳқонобод туман бўлими томонидан ИИБ ходимлари билан ҳамкорликда ўтказилган тезкор тадбирда фуқаро Л.М. фуқаро М.А.нинг ишончига кириб, унга танишлари ёрдамида Косон тумани ҳудудидан 40 сотих захирадаги ер майдонини расмийлаштириб олиб бериш эвазига 55 миллион сўмни олган вақтида ашёвий далиллар билан ушланган. 

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.