АҚШнинг Ўзбекистондаги элчиси Жонатан Ҳеник “Муштум” журналини 100 йиллик юбилей билан табриклаш мақсадида нашр таҳририятига борди. Бу ҳақда журнал ва элчихонанинг Telegram каналларида хабар берилди.
Америка Қўшма Штатларининг Ўзбекистондаги фавқулодда ва мухтор элчиси Жонатан Хеник 1 май куни “Муштум” журнали таҳририятига жамоани журналнинг 100 йиллик юбилейи билан табриклаш учун ташриф буюрди.
“Элчи жаноблари элчихона журналга обуна бўлганини, ‘Муштум’нинг мухлиси эканлигини, унинг ҳар бир сонини мунтазам ўқиб боришини таъкидлаб ўтди. Шунингдек, у ходимлар, иш жараёни ва нашр тарихи билан танишди. Журналнинг қутлуғ ёши билан элчихона номидан табриклади ва совғалар топширди”, — дейилади журнал хабарида.
АҚШнинг Ўзбекистондаги элчихонаси берган хабарда элчи журнал таҳририятига Жаҳон матбуот эркинлиги куни муносабати билан ташриф буюргани ҳақида сўз борган.
“Элчи Ҳеник ‘wоrldpressfreedomday’ арафасида нашр этилганининг 100 йиллигини нишонлаш ва Ўзбекистонда оммавий ахборот воситалари эркинлигини қўллаб-қувватлаш мақсадида буюк ўзбек ёзувчиси Абдулла Қодирий асос солган ва бошқа жадидлар ижодидан намуналар босилган ‘Муштум’ журнали таҳририятига ташриф буюрди. Бош муҳаррир Носиржон Тошматов, бир гуруҳ таниқли рассомлар ва таҳририят аъзолари элчига ажойиб карикатураларни намойиш этишди ҳамда сиёсий ва иқтисодий мавзуларни ёритишда журналнинг сатира ва юмордан фойдаланиб келаётгани ҳақидаги узоқ йиллик ва муҳим тарихидан сўзлаб беришди”, — дейилади хабарда.
Маълумот учун, “Муштум” — давлат ва жамиятдаги муаммоларни ҳажв йўли билан ёритадиган журнал бўлиб, унга таниқли ёзувчи Абдулла Қодирий ва драматург Ғози Юнус асос солган. Журнал илк бор 1923 йил 18 февралда чоп этилган. “Муштум” ўз карикатуралари билан ҳам машҳур. Журналда ўзбек адабиётининг йирик номоёндалари, кўплаб машҳур шоир ҳамда ёзувчилар ўз асарларини эълон қилиб келган.
Изоҳ (0)