Германиянинг Bild нашри Украина махсус хизматлари Россия президенти Владимир Путинни камикадзе дрон ёрдамида ўлдиришга урингани ҳақида хабар берди. Путиннинг матбуот котиби Дмитрий Песков бунга муносабат билдирди.
Песковнинг сўзларига кўра, Кремль Украина разведкаси гўёки Россия раҳбарига ҳужум уюштиришни режалаштиргани ҳақидаги мақоладан бехабар. Билд нашри Кремль бундан хабардор бўлгани ва Путиннинг ишлаш графигини ўзгартирганини айтганди.
“Йўқ, биз мазкур нашрлар билан таниш эмасмиз. Ҳозир бундай турдаги турли ‘сариқ уйдирмалар’ кўп. Бу ҳаммаси билан танишиб чиқиш учун сабаб бўлолмайди”, — деган Кремль матбуот котиби.
Билд Путинни ўлдиришга уриниш бўлганини хабар қилди
Германия нашри Украина махсус хизматлари Россия президентини камикадзе дрон билан ўлдирмоқчи бўлгани, бироқ Кремль буни сир тутаётгани ҳақида суриштирув материали эълон қилди.
Унда Украина разведкачилари Путиннинг “Руднево” саноат паркига ташриф буюриши ҳақида хабар топгани, унинг саёҳати харитасини қўлга киритгани ёзилган. Украина келажак институти эксперти, сиёсатшунос Юрий Романенко бу маълумотни тасдиқлаган.
У Путинга зарба бериш учун 17 килограмм портловчи моддага эга дрондан фойдаланилгани ва у Россиянинг барча ҳаво ҳужумидан мудофаа тизимлари орқали учиб ўтганини айтган.
“Бизникилар камикадзе дронини ишга туширган, у Россиянинг барча ҳаво мудофаа тизимлари устидан учиб ўтган ва саноат паркидан унча узоқ бўлмаган жойда қулаган. Эрталаб Кремлда дрон ҳақида маълум бўлгач, жиддий шов-шув бошланган. Песков Путин Кремлда ишлаши ҳақида янги график тузган”, — деган Романенко.
Таъкидланишича, Путиннинг ташрифи 24 апрель эмас, 27 апрель санасига белгиланган бўлган.
Изоҳ (0)