Қашқадарё вилоятининг Деҳқонобод туманида ака-укалар ота-онасининг моддий таъминоти учун олдиндан 5 минг доллар алимент пулларини тўлаб берди. Бу ҳақда “Дарё”га МИБнинг вилоят бошқармаси ахборот хизмати раҳбари Гулноза Дилмуродова хабар берди.
Таъкидланишича, ака-укалар хорижга чиқиш учун ота-онасига алимент тўлашга рози бўлган.
“Оила кодексининг 109-моддасига кўра, вояга етган, меҳнатга лаёқатли болалар меҳнатга лаёқатсиз, ёрдамга муҳтож ўз ота-онасига таъминот беришлари ва улар тўғрисида ғамхўрлик қилишлари шарт. Мажбурий ижро бюроси органлари иш юритувида ота-оналардан фарзандларига алимент ундириш билан бир қаторда, болалардан ҳам ота-онасига моддий таъминот ундириш тўғрисидаги ижро ҳужжатлари мавжуд.
Жумладан, бюронинг Деҳқонобод туман бўлими иш юритувида Фуқаролик ишлари бўйича Ғузор туманлараро судининг ижро варақасига асосан жавобгарлар Ш.Б. ва Д.Б.ларнинг ҳар биридан меҳнатга ҳақ тўлашнинг энг кам миқдорининг иккидан бир қисми миқдорида қатъий суммада алимент ундириш белгиланган. Олиб борилган ижро ҳаракатлари давомида қарздорлар хорижга чиқмоқчи эканини билдирган. Бўлим ходимлари томонидан берилган ҳуқуқий тушунтиришлар натижасида ака-укалар 5 йиллик алимент пулини олдиндан тўлаб бериш учун мурожаат қилган”, — дейди МИБнинг Деҳқонобод туман бўлими бошлиғи Камол Рўзиев.
Қўшимча қилинишича, тарафларнинг ўзаро келишуви натижасида жорий йилнинг 25 апрель куни фарзандлар ота-онасига нақд шаклда алимент пулини тўлаб берган.
Изоҳ (0)