Фарғона вилояти Бешариқ туманидаги 2-умумтаълим мактабининг 11-синф ўқувчиси Абдуллоҳ Муҳаммадов муддатидан аввал 11 та хорижий олий таълим муассасаси талабасига айланди. Бу ҳақда “Дарё” мухбири хабар берди.
Абдуллоҳ АҚШ, Малайзия, Швейцария сингари давлатлардаги олийгоҳларнинг 1 млн доллардан ортиқ миқдордаги грант маблағларини қўлга киритган. Улар орасида АҚШдаги нуфузли Austin College, Franklin University, Florida Tech Institute, University of Evansville олийгоҳлари ҳам бор.
Абдуллоҳ математика ва инглиз тилидан 1110 балл тўплаб, халқаро SAT сертификатига эга бўлган. Бундан ташқари, илк уринишда IELTS’дан 6,5 балл олган.
“IELTS сертификатини олиш учун уч ой давомида тайёргарлик кўрдим. Тўғриси, имтиҳонга етарлича тайёргарлик кўра олмадим, деб ҳаяжонга тушиб қолдим. Шунинг учун илк уринишдаги натижаларим юқори чиқмади — IELTS’дан 6,5 балл олдим. Албатта, қайта имтиҳон топшириб, яна юқорироқ балл тўплашим мумкин эди. Лекин мен қайтадан IELTS топширишни ўрнига SAT имтиҳонига тайёрландим. Математика ва инглиз тилидан 1110 балл тўплаб, халқаро SAT сертификатини қўлга киритдим. Бу натижа менга АҚШнинг топ университетларига ҳужжат топширишим учун етарли бўлди.
Жами 20 та хорижий ОТМга ҳужжат топширганман. Ҳозиргача уларнинг 13 тасидан жавоб келди. Бу университетлардан ҳар хил миқдорда грант ютганман. 13 та ОТМдан қўлга киритган грантларимнинг умумий миқдори 1 млн доллардан ошган. Буларнинг қаторида АҚШдаги топ юзталикка кирадиган университетлар ҳам бор.
Ўзим жаҳон рейтингида 72-ўринда турадиган Austin College’да компьютер технологиялари йўналишида таълим олмоқчиман. IT йўналишини танлашимга сабаб, ҳозирда Ўзбекистонда президентимиз бу соҳага жуда катта эътибор қаратяптилар. Тошкентда катта-катта IT парклар очиляпти. Хорижнинг нуфузли университетларида ўқиб, келажакда Ўзбекистоннинг ривожланишига ўз ҳиссамни қўшиш ниятидаман”, — дейди Абдуллоҳ Муҳаммадов.
Изоҳ (0)