Ohangaronda amalda faoliyat ko‘rsatmayotgan korxona 105 mln so‘mlik tenderlarni yutib oldi
Toshkent viloyati Ohangaron davlat o‘rmon xo‘jaligi 14–25-aprel kunlari jami boshlang‘ich qiymati 107 million so‘m bo‘lgan ikkita tender o‘tkazdi (1, 2). “Daryo” muxbiri lot ma’lumotlarini ko‘zdan kechirish jarayonida tender g‘olibi bo‘lgan tadbirkorlik subyekti amalda faoliyatini to‘xtatganini aniqladi.
Tenderlarning biri o‘g‘it, ikkinchisi paxta mato sotib olish uchun o‘tkazilgan. Ularda ikkita MCHJ ishtirok etgan bo‘lib, Angren Rustam Grand g‘olib deb topilgan, Angren New Leader esa zaxira yetkazib beruvchi sifatida ko‘rsatilgan. Ikkita tender bo‘yicha jami shartnoma summasi 105 million so‘mdan ortiqqa baholandi.
Tender ishtirokchisi bo‘lgan korxonalarning rahbariyati bilan tanishish jarayonida g‘olib korxona — Angren Rustam Grand MCHJ faoliyat ko‘rsatmayotgan tadbirkorlik subyekti ekani ma’lum bo‘ldi.
“Daryo” muxbiri holat yuzasidan izoh olish maqsadida korxona rahbari bilan bog‘landi. Go‘shakni ko‘targan shaxs o‘zini rahbar Rustam Baxarovning ukasi sifatida tanishtirdi va vaziyatni quyidagicha izohladi:
“Korxona rahbari mart oyining boshida chet elga dam olish uchun ketgan edi. Rahbar O‘zbekistonda emasdi, uning tasdiqlovi ham yo‘q, shu sabab firma tenderlarda ishtirok etolmadi. Yaqinda rahbar keldi va biz xarid savdolarida qatnashishni boshladik. Firma yopilmagan, shunchaki rahbar chet elda bo‘lgani uchun faoliyat qog‘ozda to‘xtab qolgan, biz e’tibor bermay qolganmiz”.
Mas’ullardan ushbu tender natijalariga e’tibor qaratib, shubhali holatlarni nazoratga olishni so‘raymiz.
