Ўзбекистон ва Италия ўртасидаги муносабатларни янада кенгайтириш масалалари кўриб чиқилди
Шавкат Мирзиёев 26 апрель куни Ўзбекистонга ташриф буюрган Италия мудофаа вазири Гвидо Крозеттони қабул қилди.
Президент матбуот хизматининг хабар қилишича, Ўзбекистон ва Италия ўртасидаги кўп қиррали муносабатларни янада кенгайтириш масалалари кўриб чиқилди.
Учрашув аввалида мудофаа идораси раҳбари Ўзбекистон етакчисига Италия президенти Сержо Маттарелла ва Вазирлар кенгаши раиси Жоржи Мелонининг саломи ва энг эзгу тилакларини етказди. Икки томонлама ҳамкорликнинг бугунги даражаси мамнуният билан қайд этилди.
Суҳбатда энергетика, шу жумладан, қайта тикланувчи энергетика, логистика, қишлоқ хўжалиги ва бошқа тармоқларда амалий ҳамкорлик қилиш масалаларига алоҳида эътибор қаратилди.
Давлат раҳбари Ўзбекистон ва Италия мудофаа идоралари ўртасида шериклик муносабатларини йўлга қўйиш муҳимлигини таъкидлади.
Минтақавий барқарорлик ва хавфсизликни таъминлаш, жумладан, Афғонистондаги вазиятни тинч йўл билан тартибга солиш масалалари юзасидан ҳам фикр алмашилди.
Италия мудофаа вазири Крозетто Гвидо президент қабулидан аввал Ўзбекистон мудофаа вазири генерал-лейтенант Баҳодир Қурбонов билан ҳам учрашди. Учрашувда хавфсизлик ва мудофаа соҳасидаги ҳамкорликнинг бугунги ҳолати, унинг ривожланиш истиқболлари муҳокама қилинган.
