“Ювентус” Еврокубоклардан четлатилиши мумкин
УЕФА “Ювентус” жамоасини Еврокубоклардан четлатиши мумкин. Бу ҳақда La Gazzetta dello Sport хабар берди.
“Ювентус” футболчиларнинг трансфер нархини ошириб кўрсатганликда, шунингдек, ходимларнинг харажатлари ҳақидаги маълумотларни ва футболчилар маошининг ҳақиқий ҳажмини яширганликда айбланган. Шу боис 2023 йилнинг январь ойида А Серия доирасида клубдан 15 очко олиб қўйилганди. Апрель ойида эса жамоага очколар қайтарилди. Италия футбол федерациясининг федерал апелляция суди (FIGC) ишни қайта кўриб чиқиши лозим.
Хабарларга кўра, агар бу иш бўйича якуний қарор яқин ойларда чиқарилмаса УЕФА “Ювентус”ни Еврокубоклардан четлатиши мумкин. Турин клуби камида 1 йилга халқаро мусобақалардан четлатилади. Европа Лигасидаги эҳтимолий ғалаба дисквалификациядан қутулиб қолишга ёрдам бермайди, бироқ узоқ муддатли четлатишдан сақлаб қолиши мумкин.
Агар дисквалификация бўйича қарор қабул қилинса-ю, лекин “Ювентус” Еврокубокларга йўлланма берадиган ўринни эгаллай олмаса, четлатиш бир мавсумга қолдирилади. “Ювентус” халқаро майдондаги мусобақаларда иштирок этиш учун йўлланмани қўлга киритган вақтда амал қилади.
УЕФА ЕЧЛ-2023 финали ўтказиладиган 10 июндан кейин Чемпионлари Лигаси, Европа Лигаси ва Конференциялар Лигасининг кейинги мавсум иштирокчиларининг рўйхатини тузиши керак. “Ювентус” ариза бериши учун июлнинг охири ёки августнинг бошигача вақт берилиши мумкин.
УЕФА параллел равишда “Ювентус”нинг молиявий фирибгарликлари бўйича суриштирув ўтказмоқда. Ташкилот Турин прокуратурасидан барча ҳужжатларни олган ва уларни ўрганиб чиқмоқда. УЕФА бу иш бўйича FIGC қарори июнь ойи охиригача эълон қилинишига умид қилмоқда.
Агар қарор янги Еврокубоклар мавсуми бошлангунига қадар чиқарилмаса, “Ювентус”нинг халқаро майдондаги иштироки УЕФАънинг ҳалол ўйин бўйича комиссияси томонидан кўриб чиқилади.
Эслатиб ўтамиз, 2022 йилнинг ноябрида молиявий айбловлар ортидан “Ювентус” раҳбарияти истеъфо берганди. Январь ойида эса клубнинг собиқ президенти Андреа Анелли ва бош директор Маурисио Арривабене 2 йилга, собиқ вице-президент Павел Недвед 8 ойга, Фабио Паратичи эса 2,5 йилга футболдан четлатилган.
