LVMH 500 млрд доллар капиталлашувга эга бўлган биринчи Европа компаниясига айланди

Франциянинг премиум товарлар ишлаб чиқарувчи компанияси — Louis Vuitton Моët Hennessy (LVMH) 500 миллиард долларлик бозор капиталлашувига эришган биринчи Европа компанияси бўлди ва айни пайтда Европадаги энг қиммат оммавий компанияга айланди.

Шу пайтгача фақат Америка корпорациялари — Apple, Microsoft, Google, Amazon, Berkshire Hathaway, Tesla, General Electric, Johnson & Johnson ва Меtа, шунингдек, Хитойнинг нефть ва газ компанияси Petrochina ва Saudi Aramco нефть компанияси 500 миллиард доллардан ошиқ капиталлашувга эга бўлган эди. 

LVMH акциялари яқинда, айниқса, Хитойда сотувлар кўпайгани туфайли ошди. Йилнинг дастлабки уч ойи якунларига кўра, даромад 17 фоизга ўсди ва 21,04 миллиард еврони ташкил этди. Бу таҳлилчилар прогнозларидан икки баравар юқори. 

Йил бошидан бери LVMH акциялари 30 фоизга ошди. Компания апрель ойи ўртасида дунёдаги энг йирик 10 та компаниядан бирига ҳам айланган эди. 

LVMH дунёдаги энг бой одам — Бернард Арнога тегишли компания ҳисобланади. Forbes’нинг 2023 йилги рейтингида Арно Илон Маскдан дунёнинг энг бой одами мақомини тортиб олганди. 

Арнонинг исми LVMH’га тегишли брендлар каби кенг жамоатчиликка унчалик маълум эмас. Унга тегишли брендлар — Louis Vuitton, Christian Dior, Tiffany, Sephora, Givenchy, Mark Jacobs ва бошқалар.

Бернард Арно LVMH бошқарувини қўлга олганидан сўнг, ўттиз йил ичида компанияни бутун дунё бўйлаб 70 дан ортиқ брендлар ва содиқ мижозларга эга бўлган энг йирик машҳур маҳсулотлар компаниясига айлантирди.