Fransiyaning premium tovarlar ishlab chiqaruvchi kompaniyasi — Louis Vuitton Moët Hennessy (LVMH) 500 milliard dollarlik bozor kapitallashuviga erishgan birinchi Yevropa kompaniyasi bo‘ldi va ayni paytda Yevropadagi eng qimmat ommaviy kompaniyaga aylandi.
Shu paytgacha faqat Amerika korporatsiyalari — Apple, Microsoft, Google, Amazon, Berkshire Hathaway, Tesla, General Electric, Johnson & Johnson va Meta, shuningdek, Xitoyning neft va gaz kompaniyasi Petrochina va Saudi Aramco neft kompaniyasi 500 milliard dollardan oshiq kapitallashuvga ega bo‘lgan edi.
LVMH aksiyalari yaqinda, ayniqsa, Xitoyda sotuvlar ko‘paygani tufayli oshdi. Yilning dastlabki uch oyi yakunlariga ko‘ra, daromad 17 foizga o‘sdi va 21,04 milliard yevroni tashkil etdi. Bu tahlilchilar prognozlaridan ikki baravar yuqori.
-19.jpg)
Yil boshidan beri LVMH aksiyalari 30 foizga oshdi. Kompaniya aprel oyi o‘rtasida dunyodagi eng yirik 10 ta kompaniyadan biriga ham aylangan edi.
LVMH dunyodagi eng boy odam — Bernard Arnoga tegishli kompaniya hisoblanadi. Forbes’ning 2023-yilgi reytingida Arno Ilon Maskdan dunyoning eng boy odami maqomini tortib olgandi.
Arnoning ismi LVMH’ga tegishli brendlar kabi keng jamoatchilikka unchalik ma’lum emas. Unga tegishli brendlar — Louis Vuitton, Christian Dior, Tiffany, Sephora, Givenchy, Mark Jacobs va boshqalar.
Bernard Arno LVMH boshqaruvini qo‘lga olganidan so‘ng, o‘ttiz yil ichida kompaniyani butun dunyo bo‘ylab 70 dan ortiq brendlar va sodiq mijozlarga ega bo‘lgan eng yirik mashhur mahsulotlar kompaniyasiga aylantirdi.
Izoh (0)