“Форсаж-10” фильмининг янги трейлери намойиш этилди (видео)

Универсал студияси “Форсаж-10” кинокартинасининг расмий трейлерини эълон қилди. Лойиҳа премьераси 17 майга режалаштирилган.

Франшизанинг янги қисмида Торетто ва унинг шериклари ўлдирилган наркобароннинг ўғли Данте (Жейсон Момоа ижро этган қаҳрамон) билан яна бир кучли рақибга дуч келади. Фильмда бош ролларни Мишел Родригес, Тайриз Гибсон, Жордана Брюстер, Бри Ларсон, Шарлиз Терон, Жон Сена, Ҳелен Миррен ва бошқалар ижро этган.

Лойиҳага Луи Летере (“Алдаш иллюзияси” лойиҳаси муаллифи) режиссёрлик қилган. У, шунингдек, “Форсаж-11” фильмини ҳам суратга олади. Фильмнинг бюджети 340 миллион долларни ташкил этди.

Тасдиқланмаган маълумотларга кўра, фильмнинг бу қисми “Форсаж” кинокартиналари орасидаги энг қиммат қисми бўлади. Фильмнинг барча қисмлари 2001 йилдан буён 6,6 миллиард доллар маблағ йиғган. “Форсаж” фильмининг сўнгги, яъни 11-кинокартинаси 2024 йилда катта экранларга чиқади.