Мактабгача ва мактаб таълими вазири Ҳилола Умарова ҳамда Россиянинг “УчимЗнаем” мактаби директори, госпитал мактаблар лойиҳаси ташкилотчиси ва раҳбари Сергей Шариков иштирокида учрашув бўлиб ўтди.
Тадбир Болалар гематологияси, онкологияси ва клиник иммунологияси марказида ташкил этилган “Меҳрли мактаб”да ўтказилган бўлиб, унда Ўзбекистон ва Россия томонларидан масъул ходимлар иштирок этган.
Учрашувда Мактабгача ва мактаб таълими вазирлиги ҳамда Россиянинг “УчимЗнаем” госпитал мактаби томонидан “Узоқ муддатли даволанаётган болалар учун таълим муҳитини яратиш” бўйича ҳамкорлик шартномаси имзоланди.
Маълумот учун, ҳозирда “Меҳрли мактаб” давлат таълим муассасасида 81 нафар мактабгача ва 71 нафар мактаб ёшидаги ўқувчилар мавжуд. Бу ерда ўқув жараёнини ташкил этиш учун алоҳида ўқув режа тасдиқланган бўлиб, дарс машғулотлари ўзбек ва рус тилларида, 12 та фандан олиб борилади.
Келгусида Қорақалпоғистон Республикаси, Андижон ва Фарғонада ҳам шу каби госпитал мактаблар очилиши режалаштирилган.
2022 йил 25 август куни Тошкент вилоятининг Зангиота туманида “Таскин” деб номланган биринчи болалар хосписи очилганди. Хоспис айни дамда 20 нафар беморга мўлжалланган бўлиб, бемор бола ва унинг оила аъзоларига ижтимоий-психологик мадад беради.
Изоҳ (0)