Самарқанд шаҳрида хонандани кўрсатувга чиқариб бериш эвазига 1,5 миллион сўмга чув туширган андижонлик йигит қўлга тушди. Бу ҳақда вилоят Ички ишлар бошқармаси ахборот хизмати хабар берди.
Хабарга кўра, фуқаро самарқандлик санъаткорга қўнғироқ қилиб, ўзини Zo‘r TV телеканалида эфирга узатилиб борилаётган “Хафа бўлиш йўқ” кўрсатувининг бошловчиси, деб таништирган. Ушбу кўрсатувга чиқаришни ваъда қилиб, 1,5 миллион сўм пулни ўтказиб олган. Шундан сўнг ғойиб бўлган.
Хонанда эса Самарқанд шаҳар Ички ишлар органлари фаолиятини мувофиқлаштириш бошқармасига ариза билан мурожаат қилиб, ушбу шахсга нисбатан қонуний чора кўрилишини сўраган.
Вилоят ИИБ тезкор қидирув бошқармаси, киберхавфсизлик бўлими ходимларининг тезкор қидируви натижасида мазкур фирибгарлик жинояти фош этилган. Уни Андижон вилояти Марҳамат туманида яшовчи йигит содир этгани маълум бўлди. Унга нисбатан Жиноят кодексининг 168-моддаси 1-қисми билан жиноят иши қўзғатилиб, тергов ҳаракатлари олиб борилмоқда.
Изоҳ (0)