Ўзбекистон халқ артисти, актриса Зуҳра Ашурова эгизаги йўқлиги, нима сабабдан унга Зуҳра деб исм қўйишгани, ҳужжатда 16 сентябрь деб ёзилган бўлса-да, туғилган кунини 31 августда нишонлаши ҳақида гапириб берди.
“Бешинчи фарзанд бўлганман, отамнинг ҳам хафсаласи пир бўлгандир”
“Оилада бечинчи фарзандман, менинг бувим Дўрмонда доялик қилган. Бувим ‘Дўрмоннинг 90 фоиз боласини мен туғдирганман’, — дерди. Онамни тўлғоқ тутган вақт бувимни чақириб келишган экан, болалар уйғониб қолмасин деб ошхонада мени дунёга келтирган экан.
Чиллам чиққанидан кейин ҳам исмим қўйилмаган экан. Бир куни холамнинг катта қизи келиб, онамдан менинг исмимни нима қўйишганини сўраган. Онам ҳали ҳам исмим қўйилмаганини айтган. Бешинчи фарзанд бўлганман, отамнинг ҳам хафсаласи пир бўлган”, —деб эслайди Зуҳра Ашурова.
“Холамнинг қизи онамга: ‘Кўнглингга олмасанг менинг исмимни қўй, номим ўчиб кетмасин’, — деб айтган. Улар бефарзанд бўлган. Онам отамга ҳамма воқеани гапириб берган. Кейин отам тонгга яқин туғилганимни эслаб, Зуҳро юлдузига қиёслаб исмимни қўйишган.
Орадан анча вақт ўтиб туғилганлик ҳақида гувоҳномамни олгани боришган. Отамга фарзандингизни туғилгани қачон эди, энди туғилганлик ҳақида гувоҳномасини олгани келдингизми”, — дейишган.
“Аслида 31 августда туғилганман. Отам фарзандимни туғилганига кўп бўлмади, 16 сентябрда туғилди, — деб айтган. Исмим Зуҳра, туғилган куним иккита: 31 август ва 16 сентябрь. Отам айтган туғилган кунимни, яъни 16 сентябрни 1997 йилгача нишонлаб юрдим.
1998 йилнинг 15 сентябрида отам томимизнинг устига ёнғоқ қоқаман, деб чиқиб йиқилган, касалхонага олиб боришган ва ўша ерда вафот этган. Отамни 16 сентябрь куни кўмганмиз. 1998 йилдан бери туғилган кунимни 31 августда нишонлайман, 16 сентябрь мен учун жуда таъсирли кун” , — дейди актриса.
Изоҳ (0)