Сурхондарё вилоятида Lacetti иштирокида юз берган йўл-транспорт ҳодисаси оқибатида икки киши ҳалок бўлди. Бу ҳақда “Hudud” информацион дастурида маълум қилинди.
Қайд этилишича, 6 апрель куни Жарқўрғон тумани “Оқтепа” маҳалласи ҳудудидан ўтувчи М41 автомобиль йўлида Nexia ҳамда Lacetti автомобиллари иштирокида ЙТҲ содир бўлди.
Ўрганиш давомида аниқланишича, Денов—Термиз йўналишида ҳаракатланиб келаётган Lacetti ҳайдовчиси тезликни ошириб, нотўғри қувиб ўтишни амалга оширгани сабаб қарама-қарши йўналишда келаётган транспорт воситаси билан тўқнашиб кетган.
Ҳодиса оқибатида Nexia ҳайдовчиси ва Lacetti’нинг олд ўриндиғида бўлган йўловчи воқеа жойида вафот этган. Машиналар ичида бўлган бошқа йўловчилар оғир аҳволда шифохонага ётқизилган.
Эслатиб ўтамиз, 2022 йилнинг октябрда ички ишлар вазири ўринбосари Бекмурод Абдуллаев автомобиль йўлларининг қанча қисми талабга жавоб бермаслигини маълум қилганди. Унга кўра, январь—октябрь ойлари давомида 7 минг 636 та йўл-транспорт ҳодисаси содир этилган. Шундан 1 минг 931 таси ўлим билан якун топган. Айнан йўл инфратузилмаси тўғри ташкил этилмагани оқибатида 3 минг 980 та йўл-транспорт ҳодисаси содир бўлган. Йўлларнинг талабга жавоб бермаслиги йўл-транспорт ҳодисаларининг 52 фоизини ташкил этади.
Изоҳ (0)