Ҳужжатда ёпилган, амалда эса аҳолига хизмат кўрсатаётган Қамашидаги қўрқинчли шифохона

Ижтимоий тармоқларда Қашқадарё вилоятининг Қамаши туманида жойлашгани ва айни кунда ҳам аҳолига тиббий хизмат кўрсатиб келаётгани айтилган қаровсиз, абгор бинода жойлашган қишлоқ врачлик пункти тасвирланган видео тарқалди. Мурожаатчи “Азлартепа” МФЙда жойлашган Қурилиш қишлоғи аҳолиси айнан шу, абгор ҳолатдаги бинода жойлашган тиббиёт масканидан фойдаланиб келишаётганини билдирган.

Мазкур видео ижтимоий тармоқларда эълон қилиниб, кўплаб муҳокамаларни келтириб чиқаргач, вилоят Соғлиқни сақлаш бошқармаси бунга муносабат билдирди.

“ ‘Азлартепа’ МФЙ ҳудудидаги Қурилиш қишлоғида жойлашган собиқ Қурилиш ФAП (фелдшерлик акушерлик пункти) биноси 1979—1980 йилларда турар жой сифатида қурилган бўлиб, 1989 йилда собиқ хўжалик маъмурияти томонидан аҳолига тиббий хизмат кўрсатиш ва эмлаш ишларини олиб бориш учун Қоратепа амбулаториясига берилган. 2007 йилдан буён маҳалла фуқаролар йиғини ҳудудидаги 3250 нафар аҳолига Қоратепа қишлоқ участка шифохонаси томонидан тиббий хизмат кўрсатилмоқда. Шифохонада 9 нафар шифокор, 63 нафар ўрта тиббиёт ходими фаолият кўрсатмоқда.

Тиббиёт бирлашмаси томонидан эмлаш тадбирлари мазкур шифохонанинг амбулатория қисмида ташкил этилиши бўйича аниқ топшириқлар берилган. Асосий тадбирлар амбулаторияда ташкил этилган, аммо аҳоли талабига кўра баъзида қишлоқ участка шифохонасидан 3 километр масофада жойлашган эски ФAП биносида ҳам эмлаш амалга оширилган. Айни пайтда эски ФAП биносидан фойдаланиш қатъиян тўхтатилиб, эмлаш тадбирлари фақат қишлоқ участка шифохонаси амбулатория қисмида олиб борилмоқда”, — дейилади бошқарма ахборотида.

“Дарё” журналисти билан суҳбатлашган видео муаллифи Ҳумоюн Худоёров тиббиёт пунктини ёпиб қўйиш муаммо ечими эмаслигини айтмоқда.

“Кеча Қамаши туманидан ‘катталар’ келиб, пунктимизни ёпилди деб муҳрлаб кетишибди. Энди қишлоқда барча сен туфайли ёпилиб кетди, деб бунда мени айблашмоқда. Мен шунчаки янги медпункт қурилишини хоҳлаган эдим. Агар янги медпункт қурилмай, шунчаки ёпиб юборишса ёки янги пункт қурилгунча бу ишламай турса, қишлоқ аҳолисига каттагина ноқулайлик туғилади. Умид қиламанки, тиббиёт маскани янги қурилади, токи янгиси қурилгунча эскиси шу ҳолатда ишлаб туради. Ёки бирор нима қилиб берилади. Лекин шунчаки ёпиб юбориш аҳолига катта ноқулайлик туғдиради. Ишлаб турган медпунктни ёпиб юбориш ечим эмас-да”, — дейди у.

Қўшимча қилинишича, Қурилиш қишлоғи ҳудудида маҳалла тиббиёт пункти биносини қуриш бўйича туман ҳокимлигига тегишли таклифлар киритилган.