Ўзбекистон халқ артисти Мурод Ражабов 74 ёшида вафот этди. Бу ҳақда Маданият ва туризм вазирлиги ҳузуридаги Кинематография агентлигининг Telegram каналида хабар берилди.
Мурод Ражабов 1949 йилнинг 30 март куни таваллуд топган. Аммо интернет тармоғида негадир ижодкорнинг таваллуд санаси 30 май деб кўрсатилган. Ҳужжатларда унинг таваллуд куни 30 август деб ёзилган.
Актёр интервьюларида оддий ўзбекона оилада туғилгани, болалиги урушдан кейинги қийинчилик даврларига тўғри келгани ҳақида сўзлаб берган. Мурод Ражабов 1971 йили Островский номидаги Тошкент театр ва рассомлик институтининг кундузги бўлимига ўқишга қабул қилинган. Актёр илк ролини 1973 йили суратга олинган “Оловли соҳил” фильмида ижро этган. Гарчи бу рол актёрга омад олиб келмаган бўлса-да, катта тажриба бўлган.
Томошабинлар Мурод Ражабовни комик актёр деб билишса-да, у тарихий фильмлардаги роллари билан кино оламига кириб келган. 1977 йили суратга олинган “Ажойиб хаёлпараст” фильми уни комик актёр сифатида кашф этди. Ваҳоб роли билан ёш-у қарининг севимли актёрига айланди. Актёр фаолияти давомида нафақат давлат фильмлари, балки кўплаб хусусий картиналарда ҳам суратга тушди. “Темир хотин”, “Буюк Амир Темур”, “Кичкина табиб” каби турли жанрлардаги фильмларда суратга тушди.
Мурод Ражабов бир неча йиллардан буён қандли диабет билан оғриб келаётган эди. Актёр икки ой аввал “Дарё” интернет-нашрига берган интервьюсида узоқ йиллардан буён кўринмай қолганига норасмий “запрет”лар сабаб бўлгани ҳақида сўзлаб берган эди.
Изоҳ (0)