Сўнгги пайтларда глобал рецессия хавфи ортди. Бу ҳақда Жаҳон банки президенти Девид Мелпаснинг Вашингтондаги Атлантика кенгашидаги нутқига таяниб “ТАСС” хабар берди.
Сўнгги уч ҳафта ичида глобал рецессия хавфи ортдими, деган саволга у шундай жавоб берди:
Ҳа. Лекин ҳар доим таназзул хавфи бор. Биз кўраётган нарса дунё миқёсидаги ўзгаришдир.
Жаҳон банки раҳбари март ойида икки йиллик ғазначилик облигацияларининг даромадлилиги “жуда кучли” пасайганига эътибор қаратди.
Бунга сабаб сифатида АҚШда банкротлик ва айрим банкларнинг муаммолари фонида юзага чиққан “тизимнинг мўртлиги”ни келтирди.
Стагфляцияни пастроқ фоиз ставкаси бўйича кўпроқ ишлаб чиқариш билан алмаштириш керак, бу келажакда ўсиш имконини беради, — дея қўшимча қилди у.
Рецессия ўзи нима?
Айни вақтда дунёда иқтисодий фаолликнинг сезиларли пасайиш даври кузатилмоқда. Рецессия одатда ишлаб чиқариш ва инвестициялар ҳажмининг, корхоналар фойдасининг пасайишига ва ишсизликнинг ошишига олиб келади.
2007—2009 йиллардаги глобал молиявий инқироз бутун дунё бўйлаб иқтисодий ўсишни деярли 4 фоизга қисқартирди.
Айрим мамлакатларда, жумладан, Британия, Франция ва Германияда конвенсияга кўра, салбий ялпи ички маҳсулот ўсишининг тўртдан икки қисми рецессиядан далолат беради.
Аммо кўпгина иқтисодчилар бу таърифни жуда тор деб ҳисоблайди. Япония Вазирлар Маҳкамаси рецессияни таърифлашда заводлардаги ишлаб чиқариш, чакана савдо ва бандлик каби бир нечта кўрсаткичлардан фойдаланади.
Америка ҳукумати рецессияни эълон қилиш ваколатидан бутунлай воз кечган. Бу ваколат Иқтисодий тадқиқотлар миллий бюросига — хусусий, нотижорат тадқиқот гуруҳига тегишли.
Жаҳон банки январь ойидаги ҳисоботида бир қатор мамлакатлар томонидан пул-кредит сиёсатининг кескинлашуви ва таъминот занжиридаги узилишлар фонида жорий йилда глобал иқтисодий ўсиш 1,7 фоизгача секинлашиши ҳақида огоҳлантирган эди.
Изоҳ (0)