Андижон шаҳридаги Олимпия ва паралимпия спорт турларига тайёрлаш марказида ўтказилган “Конституция ўзимизники” шиори остидаги навбатдаги тарғибот тадбирида саккиз мингдан ортиқ олий таълим муассасаларининг талабалари ҳамда аҳоли вакиллари иштирок этди. Бу ҳақда “Дарё” мухбири хабар бермоқда.
Хонанда Шоҳжаҳон Жўраев отаси, Ўзбекистон халқ артисти Шерали Жўраевнинг “запрет”дан саҳнага қайтиши ҳақида гапирди.
“23 йил — бу ҳазилакам гапмас. Ўртоқлар, Шерали Жўраев, мана шу Андижон халқи, мани отам. Сизларни биламан чет элларга борганда Ватан соғинчида бизга жўнатасизлар ўша видеоларни. Айнан “Ўзбегим”ни жўнатасизлар, Ватан соғинчида. Мана шунинг учун ҳам ҳозир “Ўзбегим”ни айтиб чиқдим, сизларни ёниларга.
23 йиллик санада бир инсон туғилади, катта бўлади, фарзандли ҳам бўлади. Бу йиллар ичида мен бола чақали ҳам бўлиб кетдим.
23 йил халқидан тўсиб қўйиш мумкинми? Отам 23 йил саҳнани кўрмадилар. Шундай давр бўлди унда. Давр шунақа эди, бу ерда кимнидир айблай олмаймиз. Энди ҳозирги янги даврни қаранг. Президентимиз айтаяптилар, инсон қадрини улуғла, инсон қадрига қара деяптилар. Буни биринчи бўлиб ўзлари бошлаб бердилар.
2017 йил эди. Отам катта саҳнада “Ўзбегим”ни айтиб чиққанларида биз фақат йиғладик. Ўшанда кутиб ўтирдик “Қани нима бўларкин? Келиб нима деркин?”, деб. Келиб, биринчи мақтаниб гапирган гаплари шу бўлди “Шоҳ, президентимиз мени 40 ёшимни қайтариб бердилар”. Мана шундан кейин бир неча концертлар қўйилди.
Ўртоқлар, биз ўқишга ҳам киролмаганмиз. Бизни ашула айтишимиз ҳам қийин бўлган. Саҳнани ҳам беришмаган. Неча қадам юришимизгача ёзиб беришарди. Шералини ашуласини айтмайсан ҳам деб қийнашарди. Шу кунлар ўтиб кетдида. Инсон қадрини улуғла, деб қўйган сўзларини жавобимасми бу?”, — дейди Шоҳжаҳон Жўраев.
Изоҳ (0)