Қашқадарё вилоятининг Чироқчи туманидаги қишлоқларнинг бирида пайдо бўлган ёввойи айиқ ҳудуддаги мактаб биносига киришга урингани хабар берилганди. Чироқчи туман Мактабгача ва мактаб таълими бўлими раҳбари Фарҳод Жумановнинг “Дарё”га билдиришича, айиқ мактаб биносига киролмаган.
“Шу хабарни ўқиганимдан сўнг, тезда 103-мактабга етиб келдим ва директор билан суҳбатлашиб, ҳолатга аниқлик киритдим. Директорнинг айтишича, айиқ бинога киришга уриниб, дераза ойналарини уриб синдирган. Эшикка ёпишган. Аммо ичкарига киролмаган”, — дейди Фарҳод Жуманов.
Масъулнинг аниқлаштиришича, айиқ мактаб биносига киришга уринганида ичкарида 35 нафардан ортиқ ўқувчи бўлган.
“Ўқитувчилар топшириғига кўра, ўқувчилар синфхона эшикларини ёпиб олган ва ваҳимага тушмасликка ҳаракат қилишган. Бу пайтда 2 та синфхонада 35 нафардан ортиқ ўқувчилар бўлган. Хайриятки, айиқ ичкарига киролмаган. Воқеадан ҳеч ким жабрланмаган, ҳеч кимга зарар етмаган”, — дейди у.
Чироқчи тумани ҳокимлиги ахборот хизматининг “Дарё”га билдиришича, одамлар қувишидан ваҳимага тушган айиқ айни пайтда қишлоқдаги кичик ғорлардан бирига кириб олган.
Изоҳ (0)