Andijon shahridagi Olimpiya va paralimpiya sport turlariga tayyorlash markazida o‘tkazilgan “Konstitutsiya o‘zimizniki” shiori ostidagi navbatdagi targ‘ibot tadbirida sakkiz mingdan ortiq oliy taʼlim muassasalarining talabalari hamda aholi vakillari ishtirok etdi. Bu haqda “Daryo” muxbiri xabar bermoqda.
Xonanda Shohjahon Jo‘rayev otasi, O‘zbekiston xalq artisti Sherali Jo‘rayevning “zapret”dan sahnaga qaytishi haqida gapirdi.
“23 yil — bu hazilakam gapmas. O‘rtoqlar, Sherali Jo‘rayev, mana shu Andijon xalqi, mani otam. Sizlarni bilaman chet ellarga borganda Vatan sog‘inchida bizga jo‘natasizlar o‘sha videolarni. Aynan “O‘zbegim”ni jo‘natasizlar, Vatan sog‘inchida. Mana shuning uchun ham hozir “O‘zbegim”ni aytib chiqdim, sizlarni yonilarga.
23 yillik sanada bir inson tug‘iladi, katta bo‘ladi, farzandli ham bo‘ladi. Bu yillar ichida men bola chaqali ham bo‘lib ketdim.
23 yil xalqidan to‘sib qo‘yish mumkinmi? Otam 23 yil sahnani ko‘rmadilar. Shunday davr bo‘ldi unda. Davr shunaqa edi, bu yerda kimnidir ayblay olmaymiz. Endi hozirgi yangi davrni qarang. Prezidentimiz aytayaptilar, inson qadrini ulug‘la, inson qadriga qara deyaptilar. Buni birinchi bo‘lib o‘zlari boshlab berdilar.
2017-yil edi. Otam katta sahnada “O‘zbegim”ni aytib chiqqanlarida biz faqat yig‘ladik. O‘shanda kutib o‘tirdik “Qani nima bo‘larkin? Kelib nima derkin?”, deb. Kelib, birinchi maqtanib gapirgan gaplari shu bo‘ldi “Shoh, prezidentimiz meni 40 yoshimni qaytarib berdilar”. Mana shundan keyin bir necha konsertlar qo‘yildi.
O‘rtoqlar, biz o‘qishga ham kirolmaganmiz. Bizni ashula aytishimiz ham qiyin bo‘lgan. Sahnani ham berishmagan. Necha qadam yurishimizgacha yozib berishardi. Sheralini ashulasini aytmaysan ham deb qiynashardi. Shu kunlar o‘tib ketdida. Inson qadrini ulug‘la, deb qo‘ygan so‘zlarini javobimasmi bu?”, — deydi Shohjahon Jo‘rayev.
Izoh (0)