Қозоғистон Ички ишлар вазирлиги айни дамда мамлакатда ҳайдовчилик гувоҳномаларини синов муддатидан сўнг бериш амалиётини жорий этиш зарур ёки йўқлигини ҳал қилмоқда. Бу ҳақда “Дарё”нинг Қозоғистондаги мухбири “Polisia.kz”га таяниб, хабар берди.
Бундай таклиф “ҚазАвтоЖол” компаниясидан келиб тушган. Компания вакиллари мамлакатдаги автомобиль ҳайдаш маданиятидан қаттиқ норози эканини билдирган. Жумладан, республиканинг Жезқазғон шаҳрида тезликни ошириш ҳолати жаҳон ўртача кўрсаткичидан 2,6 баробар кўп содир бўлади. Қозоғистонликларнинг автомобилни хавфсизлик камари тақмасдан бошқариш ҳолати эса 8,5 фоиз кўпроқ кузатилади.
Мутахассислар Финляндия мисолини ҳисобга олишни таклиф қилди. Бу мамлакатда ҳайдовчилик гувоҳномасини икки йиллик синов муддати ва бир қатор имтиҳонлардан сўнг олиш мумкин. Бундан ташқари, улар Star Rating for Schools халқаро мактаб лойиҳасига эътибор қаратишни сўради. Бу лойиҳа мактаблар яқинида ўқитувчилар ва ўқувчиларни жалб қилган ҳолда хавфсиз автомобиллар ҳаракати тизимини яратишга ёрдам беради.
Изоҳ (0)