36 турдаги озиқ-овқат маҳсулотлари учун бож ставкалари ноллаштирилди. Хўш, энди нархлар пасаядими?

2023 йилнинг 23 март куни Ўзбекистон президенти Шавкат Мирзиёевнинг “Истеъмол бозорларида нархлар барқарорлигини таъминлашга доир қўшимча чора-тадбирлар тўғрисида”ги фармони қабул қилинди. Унга асосан, 2024 йил 1 январга қадар 36 та гуруҳга кирадиган мингдан ортиқ товарга нисбатан божхона божининг нол ставкаси қўлланади. “Дарё” ушбу фармонни имзолаш сабаблари ва у кучга киргач бозорларда юз берадиган нархлар ўзгариши бўйича мутахассислардан изоҳ олди.

Хусусан, Давлат божхона қўмитаси бош инспектори Ҳусан Тангриев фармон озиқ-овқат бозоридаги беқарорликка барҳам бериб, инфляцияни жиловлашга қаратилганини маълум қилди.

“Хоҳлаймизми-йўқми, ҳозирги кунда аҳолининг ўрта, кам даромадли қисми ишлаб топаётган маблағининг асосий қисмини озиқ-овқат маҳсулотлари сотиб олишга сарфлайди. Шу сабабли бу фармон асосида бозорлардаги нархларнинг барқарорлигини таъминлаш мақсад қилинган. Давлат ўз ғазнасига тушиши керак бўлган маблағдан халқ фойдасига воз кечяпти”, — дейди Ҳусан Тангриев.

ДБҚ бош инспекторининг қўшимча қилишича, импорт кўламининг ошиши, биринчи навбатда, бозорнинг маҳсулотга тўйинишига олиб келади.

“Қанча кўп тадбиркор маҳсулот олиб келса, улар ўртасидаги рақобат ҳам шунчалик ошади. Бу эса маҳсулотнинг бозордаги нархига таъсир ўтказади. Фармондан асосий мақсад нархларни арзонлаштириш эмас, нархларнинг барқарорлигини таъминлаш ҳисобланади”, — дейди у.

Олий Мажлис Сенатининг Бюджет ва иқтисодий ислоҳотлар масалалари қўмитаси раиси Эркин Гадоев ҳам фармоннинг кучга кириши натижасида ички истеъмол бозорида рақобат муҳити ривожланишини таъкидлади.

“Фармон натижасида бозордаги нархлар қандай пасаяди, деган савол бор. Албатта, бу бирданига бўладиган масала эмас, чунки илгари олиб келинган товарларнинг нархи тушиши кейинги олиб келинадиган товарлар партияларига боғлиқ. Яқин бир ой ичида нархларда тушиш кузатилади”, — дея фикр билдирди Эркин Гадоев.