Тошкент шаҳрининг Сергели ва Яшнобод туманларида кучли таъсир қилувчи дори воситаларини сотаётган шахслар ушланди. Бу ҳақда Бош прокуратура ҳузуридаги департамент хабар берди.
Қайд этилишича, департамент ҳамда ДХХнинг Сергели тумани бўлимлари томонидан ИИБ ходимлари билан ҳамкорликда тезкор тадбир ўтказган. Тадбирда фуқаро Ш.Р. таниши Ж.А.дан харид қилган 12 дона “Тропикамид” номли дори воситасини бошқа бир фуқаро Ш.Ҳ.га 200 АҚШ долларига сотган вақтида ушланган. Шунингдек, унинг ёнидан 1 дона “Снуп” ёзувли флакон ва 22 дона “Регапен” номли кучли таъсир қилувчи дори воситалари ҳамда фуқаро Ж.А.дан яна 60 дона “Регапен” номли дори воситалари ашёвий далил сифатида олинган.
Шу каби, департаментнинг Яшнобод туман бўлими томонидан ИИББ ходимлари билан ҳамкорликда тумандаги Висол кўчасида ўтказилган тезкор тадбирда фуқаро М.А. 238 дона “Зардекс” номли кучли таъсир қилувчи дори воситаларини ўз хонадонида ўтказиш мақсадида сақлаб келаётгани аниқланиб, ашёвий далил сифатида олинган.
Мазкур ҳолатлар юзасидан Жиноят кодексининг 251-1-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Андижонда Қирғизистондан олиб келинган гашишни 1,6 минг АҚШ долларига сотмоқчи бўлган 37 ёшли аёл ушлангани тўғрисида хабар берилганди.
Изоҳ (0)