Фарғонада ҳокимлик балансидаги уйни 8,5 минг долларга олиб беришни ваъда қилган бўлим бошлиғи ушланди

Фарғона вилоятида ўтказилган тезкор тадбирлар давомида ноқонуний валюта айланмаси ва пора олиш билан боғлиқ ҳолатга чек қўйилди. Бу ҳақда “Замон” информацион дастурида маълум қилинди.

Қайд этилишича, департаментнинг Фарғона вилояти бўлими томонидан тезкор тадбир ўтказилган. Тадбирда валюта айирбошлаш билан шуғулланиб келган фуқаро харидорга 3,6 минг долларни 41 миллион сўмга сотганида ушланган. Шунингдек, ушбу шахснинг ёнидан жами 4,6 минг доллар ашёвий далил сифатида олинган.

Шу каби яна бир ҳолатда қонунга хилоф равишда валюта айирбошлаш билан шуғулланувчи фуқаро харидорга 3,6 минг долларни 41 миллион сўмга сотишга келишиб, шундан 2 850 долларни берган вақтида қўлга олинган.

Бундан ташқари, департамент ҳамда ДХХнинг Қувасой шаҳар бўлимлари билан ҳамкорлигида тадбир ўтказилган. Тадбирда шаҳар ҳокимлиги қошидаги хўжалик ҳисобидаги уй-жойларни рўйхатга олиш, алмаштириш ва тақсимлаш бўлими бошлиғи икки нафар фуқарога 8,5 минг доллар эвазига ҳокимлик балансида бўлган уйлардан бирига эгалик қилиш ҳуқуқини берувчи ордерни расмийлаштириш, кейинчалик уни хусусийлаштиришни ваъда қилгани аниқланган. У “ўз хизмати” эвазига олдинда 3,8 минг доллар олганида ашёвий далиллар билан ушланган.

Ҳозирда ушбу ҳолатлар юзасидан Жиноят кодексининг тегишли моддалари билан жинояти ишлари қўзғатилиб, тергов ҳаракатлари ўтказилмоқда.