Прогнозлаштириш ва макроиқтисодий тадқиқотлар институти (ПМТИ) экспертлари Тошкент шаҳрида март ойида хонадонлар учун ижара нархларининг ўзгаришини таҳлил қилди.
Таҳлил натижаларига кўра, 2023 йилда Тошкент шаҳрида уйларнинг ижара нархлари пасайишда давом этмоқда.
Маълумки, ўтган йили хонадонлар учун ижара нархлари ўса бошлаган ва октябрь ойига келиб, ўзининг энг юқори нуқтасига чиққан, сўнгра пасая бошлаганди.
“Олх.уз” маълумотлар базасига кўра, ўшанда шаҳар бўйича ўртача таъмирланган хонадон учун ижара нархи 526 долларга чиққанди.
Жорий йилнинг март ойида ижара учун ўртача нархлар февраль ойидагига нисбатан 2 фоиз пасайган ва 411 долларни ташкил этган.
Ўртача таъмирланган 2 хонали уй учун ижара нархи 340 доллардан (Сергели) 460 долларгача (Яккасарой) ўзгарган ҳолда Тошкент шаҳри учун ўртача 411 долларни ташкил этган.
3 хонали уйлар учун эса нархлар 380 доллардан (Сергели) 600 долларгача (Миробод) ўзгарган ҳолда Тошкент шаҳри учун ўртача 480 доллар бўлиб турибди.
Таъмирланган 1 хонали уй учун ўртача ижара нархи 320 долларни, 4 хонали уй учун 600 долларни, 5 хонали уй учун 660 долларни ташкил этган.
Изоҳ (0)