Шавкат Мирзиёев Хоразм вилоятидаги “Янгибозор текстиль агрокластер” масъулияти чекланган жамиятининг тўқимачилик корхонаси фаолияти билан танишди. Бу ҳақда Президент матбуот хизмати хабар берди.
Хабарга кўра, қиймати 13 миллиард сўмдан зиёд бўлган мазкур лойиҳа доирасида хориждан замонавий ускуналар келтириб ўрнатилган. Йилига 5 миллион дона тайёр трикотаж маҳсулотлари ишлаб чиқариш қуввати яратилган. Товарларнинг 65 фоизини экспортга йўналтириш мўлжалланган. Бугунги кунда бу ерда 500 га яқин хотин-қизлар ишламоқда.
Шавкат Мирзиёев корхонадаги иш жарайони билан танишиш асносида улар билан суҳбатлашди. Хотин-қизлар чекка туманларга ҳам ҳам саноат кириб келаётгани, ўз уйи яқинида шундай замонавий корхонада ишлаётганидан мамнунлигини айтди.
Шу ерда Хоразм вилоятидаги 6 та янги корхонани ишга тушириш маросими бўлди. Улар – Урганч шаҳридаги “Эко Оби ҳаёт” корхонаси томонидан гипсокартон маҳсулотлари, Урганч туманидаги “Закиров” хусусий корхонаси томонидан бурама мих, Хива гилами комбинатининг иккинчи босқичи, Боғот туманидаги “Коба текс” корхонаси томонидан тайёр газлама, Урганч туманидаги “Хорезм Solt Бизнес” корхонаси томонидан техник тузлар, Хонқа туманидаги “Хорезмтекс Фейшн” корхонаси томонидан тикув-трикотаж маҳсулотлари ишлаб чиқариш лойиҳаларидир. Ушбу корхоналар вакиллари видеоалоқа орқали мажмуалар салоҳияти ҳақида ахборот берди.
Президент Шавкат Мирзиёев рамзий тугмани босиб, ушбу янги корхоналарни ишга туширди.
Изоҳ (0)