“Мамлакатимиз бўйича бир кунда 19-20 минг тонна чиқинди ҳосил бўлмоқда” — Табиат ресурслари вазирининг биринчи ўринбосари Обиджон Қудратов
Тошкент шаҳрида 30 март — Халқаро чиқиндисиз кун муносабати билан кенг жамоатчилик билан биргаликда югуриш орқали чиқиндиларни саралаб йиғиш – “plogging” тадбири бўлиб ўтди, бу ҳақда “Дарё” мухбири хабар бермоқда.
Тадбирда Табиат ресурслари вазирининг биринчи ўринбосари Обиджон Қудратов сўзга чиқиб, чиқиндилар сектори иқлим ўзгариши, биологик хилма-хиллик нобуд бўлиши ҳамда атроф муҳитнинг ифлосланишига сабаб бўлаётганини алоҳида таъкидлаб ўтди.
“Статистик маълумотларга кўра, мамлакатимиз бўйича бир кунда 19-20 минг тонна чиқинди ҳосил бўлмоқда. Чиқиндилар турли хил металлар, шиша идишлар, макулатура, пластик ва озиқ-овқат маҳсулотлари қолдиқларидан иборат бўлиб, уларнинг фақат 32 фоизи қайта ишланмоқда”, — деди Обиджон Кудратов.
Иштирокчилар Тошкент шаҳридаги “Зеро Waste” акцияси доирасида Мирзо Улуғбек тумани Истиқлол ва Maxтумқули кўчалари чорраҳасида жойлашган истироҳат боғида акция иштирокчилари ҳудуддаги пластик бутилкалар, алюмин банкалар, макулатура ва ўрамлардан тозалади.
Бугунги кунда дунё миқёсида чиқиндилар муаммоси энг долзарб экологик масалалардан бирига айланиб улгурган. Шу боис, Туркия давлати 105 та бошқа давлатлар билан биргаликда бутунжаҳон чиқиндисиз кунини белгилаш ҳақидаги резолюцияни қабул қилиш ташаббусини илгари сурди ва Бирлашган Миллатлар Ташкилоти Бош Ассамблеяси 2022 йил 14 декабрдаги мажлисида 30 мартни ҳар йили нишонланадиган “Халқаро чиқиндисиз кун” деб эълон қилиш тўғрисида резолюцияни қабул қилган.
Урбанизация жарайони жадаллашиб, шаҳарлар кенгаяётган, аҳоли сони ўсаётган ва унинг эҳтиёжини қондириш учун миллионлаб турдаги товарлар ишлаб чиқарилаётган бир пайтда чиқиндиларни қайта ишлаш ва уларнинг утилизацияси энг катта экологик муаммолардан бири бўлиб қолмоқда.
Аҳоли томондан қаттиқ маиший чиқиндиларни дуч келган ерларга ташлаб кетиш, аҳоли пунктларида, магистрал йўл ёқаларида, дала майдонлари четларида, сув ҳавзалари қирғоқларида ноқонуний чиқиндихоналарнинг ҳосил бўлиши давом этмоқда. Ҳусусан, 2020 йил 28,9 минг, 2021 йил 18,7 минг, 2022 йилда 20,3 минг нафардан зиёд фуқаролар чиқиндиларни белгиланмаган жойларга ташлаганлиги учун маъмурий ҳуқуқбузарликлар аниқланган.
