Ижтимоий тармоқ фаоллари Тошкент шаҳрида 20—21 май кунлари ўтказилиши режалаштирилган Zhara (талаффузда “Жара” — “Дарё” изоҳи) халқаро мусиқа фестивалини бекор қилишни сўраб флешмоблар ўтказди. “Дарё” манбасининг маълум қилишича, ушбу норозиликлар фонида фестиваль номаълум муддатга қолдирилган.
Zhara фестивали ҳақида
Zhara фестивали 2016 йилда Озарбайжон пойтахти Боку шаҳрида ташкил этилган. Ҳар йили бўлиб ўтадиган ушбу тадбирда МДҲ, асосан, Россиянинг 10 дан ортиқ таниқли қўшиқчилари чиқиш қилади. Хусусан, Григорий Лепс, Филипп Киркоров, Ани Лорак, Тимати, Валерий Меладзе, Егор Крид каби санъаткорлар фестивалнинг фаол иштирокчилари ҳисобланади.
Концерт дастурлари ҳар йили турли шаҳарларда ўтказилади. 2019 йилда эса илк бор МДҲдан ташқарида, БААнинг Дубай шаҳрида бўлиб ўтган. Сўнгги уч йилда фестиваль Россиянинг турли нуқталарида ўтказилган.
2023 йил мезбонлиги учун 4 хил вариант
Фестиваль ташкилотчилари 2023 йилги концертни Германиянинг Дюссельдорф шаҳрида ўтказмоқчи эди. Бироқ сиёсий сабабларга кўра, аввал Германия, сўнг захира вариант бўлган Озарбайжон бу тадбирни ўтказишдан бош тортган. Шундан сўнг, шоу Қозоғистонга кўчирилган. Бу ҳақда расмий эълон берилган ва ҳатто чипталар сотуви ҳам йўлга қўйилганди. Аммо қозоқ жамоатчилигининг кескин норозилиги туфайли 9—12 март кунлари Олмаотада бўлиб ўтиши режалаштирилган концерт дастури ҳам бекор қилинган. Фестиваль ташкилотчилари буни “дунёдаги беқарор вазият туфайли тадбир санаси номаълум муддатга қолдирилгани” билан изоҳлаган.
Нега ҳамма фестивални ўтказишдан бош тортмоқда?
Фестивальда ўз қўшиқлари билан иштирок этадиган хонандаларнинг аксарияти рус шоу-бизнеси вакиллари ҳисобланади. Улар орасида Григорий Лепс, Филипп Киркоров, Тимати, Олга Бузова, Сергей Лазарев каби Россиянинг Украинадаги урушини очиқдан-очиқ қўллайдиган кремлпараст қўшиқчилар ҳам бор. Шу сабабли мезбон мамлакат фуқаролари ижтимоий тармоқларда фестивалга қарши кенг кўламли виртуал норозилик аскиялари уюштирган. Уларнинг фикрича, россиялик санъаткорларнинг Қозоғистондаги чиқишлари республика “Украинадаги урушни қўллаб-қувватлашини” билдиради.
Навбат Ўзбекистонга(ми?)
Шундан сўнг 2023 йилги фестиваль Ўзбекистонда бўлиб ўтиши ҳақида хабарлар чиқди. Концерт ташкилотчилари Тошкентга келиб, тадбир ўтказилиши режалаштирилган “Янги Ўзбекистон” боғига ташриф буюрди ва ОАВ учун матбуот анжумани ҳам ўтказди.
Расмий постерларда фестиваль 20—21 май кунлари бўлиб ўтиши кўрсатилганди. Унда Hammali & Наваи, Артик&Асти, Марй Гу, Жонй, Егор Крид, Сергей Лазарев, Натан, Миша Марвин каби россиялик шоу-бизнес вакиллари иштирок этиши кўзда тутилганди.
#BoycottRussianАрмйАртисц хештеги
Концерт Ўзбекистонга кўчирилгани ҳақидаги хабарлар интернетнинг ўзбек сегментида катта резонансга сабаб бўлди. Тармоқ фаоллари ушбу фестивалнинг Тошкентда бўлиб ўтишига турлича муносабат билдирди: айримлар кремлпараст хонандаларнинг Ўзбекистонда концерт уюштириши мамлакатнинг халқаро ҳамжамият олдидаги имиджига салбий таъсир кўрсатишини айтса, бошқалар улар шунчаки санъаткор эканини, бунда ҳеч қандай сиёсий мотив кўрмаслик кераклигини билдирди.
Хусусан, блогер Мирзо Зоминий фестивални бойкот қилишга чақириб, хонандаларнинг аксарияти “ўрис босқинини қўллаб-қувватлашини” билдирди.
“Мен З-артистларнинг мустақил Ўзбекистонимиз тупроғида бўлиши, куйлаши, ижро этишини очиқчасига хоҳламайман ва маъқулламайман, чунки улар Кремл томонидан қўллаб-қувватланади, Кремлни қўллаб-қувватлайди. Қонхўр жиноятчилар, истилочи ва уларнинг тарафдорларига суд тилайман. Repost қилинг ва бойкотга чорланг”, — деб ёзди у Telegramъдаги каналида.
Telegramъда бошланган акция Twitter ва Instagram ижтимоий тармоқларига ҳам кўчди. Статистик маълумотлар сўнгги кунларда #BoycottRussianАрмйАртисц хештегининг ўсиш динамикаси кескин кўтарилганини кўрсатмоқда.
Концерт “отмен”ми, “отмен”масми?
“Дарё”нинг ҳукуматга яқин манбасининг маълум қилишича, Zhara фестивали номаълум муддатга қолдирилган.
“Ушбу қарор ташкилотчилар томонидан мустақил равишда қабул қилинган”, — дейилади хабарда.
Sputnik Ўзбекистон нашри эса фестиваль ташкилотчиларидан олган маълумотларига таяниб тадбир ўз вақтида бўлиб ўтиши ҳақида хабар берди.
“Фестиваль бўлиб ўтади, унинг бекор қилингани ҳақидаги маълумотлар ишончли эмас. Ҳаммаси режа бўйича кетяпти. Барча томошабинларни 20 ва 21 май кунлари Тошкентда кутиб қоламиз”, — дейилади Zhara матбуот хизмати муносабатида.
Бундан ташқари, ушбу концерт дастури учун чипталар сотиш билан шуғулланаётган iTicket.uz сайти Instagramъдаги саҳифасида фестиваль ўз вақтида бўлиб ўтишини, фақат расмий манбаларга ишониш кераклигини ёзди. Сайтда чипталар сотуви давом этмоқда.
Шунингдек, Zharaънинг Instagramъдаги расмий саҳифасида ҳали ҳам шоу концерт белгиланган муддат — 20—21 май кунлари Тошкент шаҳрида бўлиб ўтиши ҳақида қайд мавжуд.
“Дарё” воқеалар ривожини кузатиб боради.
Изоҳ (0)