Ўзбекистоннинг Дубайдаги Бош консуллиги ходимлари “ISTA GOSTAR TOOS” қурилиш компанияси менежери Habib Toosi билан учрашув ўтказди. Бу ҳақда “Дунё” агентлиги хабар берди.
Қайд этилишича, мулоқот давомида БААдан Ўзбекистонга инвестицияларни жалб этиш, янги инновацион қурилиш технологияларини олиб кириш ҳамда турли объектларни қуриш масалалари муҳокама қилинган.
Дипломатлар инвесторларни Ўзбекистонда ҳаётга тадбиқ этилаётган кенг кўламли ислоҳотлар ва ишбилармон доира вакилларига қаратилаётган алоҳида эътибор ҳамда хорижий сармоядорлар учун яратилган шарт-шароитлар билан таништирган. Ўзбекистон иқтисодиётининг турли жабҳаларида лойиҳаларни амалга ошириш учун хорижий сармояларни киритиш икки томон учун манфаатли бўлиши таъкидланган.
Суҳбат якунида томонлар Ўзбекистонда инвесторларга яратилган шарт-шароитлар билан бевосита танишиш мақсадида ушбу компания раҳбариятининг мамлакатга ишчи сафарини ташкил этиш тўғрисида келишувга эришилган.
Аввалроқ Ўзбекистон ҳудудларининг иқтисодиётни саноатлаштириш динамикаси таҳлил қилингани, Хитой компанияси Ўзбекистонда шаҳар ва транспорт инфратузилмасини қуришда иштирок этмоқчилиги тўғрисида хабар берилганди.
Изоҳ (0)