Ёшлар телеканалининг “Биз томонларда“ деб номланган кўрсатувида Қорақалпоғистон Республикаси вилоят сифатида тилга олинди. Бунинг учун телеканал масъуллари узр сўраб, хатоликка йўл қўйганларга нисбатан чора кўрилишини билдирди.
“Бугун телеканалимиз фаолиятида жуда камдан кам учрайдиган қўпол хатоликка йўл қўйилди. ‘Ёшлар’ телеканали орқали соат 12:05 да Қорақалпоғистон Республикасидан тайёрланган ‘Биз томонларда’ кўрсатуви намойиш этилган эди. Кўрсатувда монтаж жараёнидаги техник хатолик сабабли Қорақалпоғистон Республикасининг номи хато кўрсатилган. Ушбу қўпол хатоликка йўл қўйилгани учун биз ъЁшларъ телеканали жамоаси кўп сонли телетомошабинларимиздан узр сўраймиз. Ҳозир айбдорларга нисбатан тегишли чоралар кўрилмоқда”, — дейилади телеканал бошловчиларининг навбатдаги чиқишида.
Қўшимча қилинишича, мазкур кўрсатув “Қорақалпоғистон Республикаси”нинг номи тўғриланган ҳолда қайта намойиш этилган.
“Келгусида телеканалимизда бу каби ҳолатларнинг такрорланмаслиги юзасидан қатъий чоралар кўрилади”, — дейди телеканал бошловчилари.
Изоҳ (0)