Тошкент вилоятида қулаб тушиш арафасига келиб қолган ярим асрлик кўприк қайта қурилиб, фойдаланишга топширилди (видео)

Тошкент вилоятида қурилганига ярим аср бўлган, қулаб тушиш арафасига келиб қолган кўприк қайта таъмирланиб, фойдаланишга топширилди. Бу ҳақда “Дарё”га вилоят ҳокимлиги ахборот хизмати раҳбари Беҳзод Қобулов маълум қилди.

Айтилишича, мазкур кўприкнинг фойдаланишга топширилиш жараёнида вилоят ҳокими, фаоллар, нуронийлар ва оммавий ахборот воситалари вакиллари иштирок этган.

“Вилоят ҳокими ва фаоллар Қорасув—Бўка—Бекобод автомобиль йўлининг 6,93 км қисмида темирйўл устидан ўтувчи йўл ўтказгични мукаммал таъмирлаш ишлари билан танишди. Кенг жамоатчилик иштирокида ўтган очилиш маросимида вилоят ҳокими Зоир Мирзаев йиғилганларни қўшалоқ байрам билан самимий қутлади.

‘Тошкент кўприклардан фойдаланиш’ унитар корхонаси бунёдкорларига миннатдорлик билдирди. Янги бунёд этилган кўприк автомобиллар ҳаракатининг узлуксизлиги баробарида пиёдалар хавфсизлигини таъминлашда муҳим аҳамият касб этиши хусусида сўз юритди”, — дейди Беҳзод Қобулов.

Маълум қилинишича, мазкур кўприк учун бюджет маблағлари ҳисобидан 25,6 миллиард сўм маблағ ажратилган бўлиб, таъмирлаш ишларида 94 кун давомида 85 дан ортиқ ходимлар, 30 дан ортиқ махсус техникалар жалб этилган.

“Шу куни Nurafshon Biznes City ҳудудида жойлашган Муҳаммад ал-Хоразмий номидаги Тошкент ахборот технологиялари университети Нурафшон филиали ҳудудида IT-паркнинг Тошкент вилояти филиали биноси ҳам очилди. Меҳмонлар қисқа мулоқотдан сўнг рамзий лентани кесишиб, бинода яратилган шарт-шароитларни кўздан кечиришди.

Айтиш зарурки, бинода барча қулайликлар яратилган. Хоналарга замонавий мебел жиҳозлари, компьютер технологиялари ўрнатилган. Ошхона, дам олиш хоналари ҳам ташкил этилган. Вилоят маҳаллий бюджетидан 8 миллиард сўм маблағ ажратилиб, замонавий компьютерлар жамланмаси ва мебел жиҳозлари билан таъминлашга эришилди.

Давлатимиз раҳбари томонидан вилоятимизда фаолият юритаётган IT компания вакилларига яратган имкониятларидан сўнг вилоятда IT-Парк резидентлари сони 32 тага етказилди”, — дейди ҳокимлик вакили.

Қўшимча қилинишича, ўша куни 3,5 миллиард сўм эвазига барпо этилган “Нуронийлар ва маънавият маскани” ҳам фойдаланишга топширилган.

“Унда нуронийлар учун дам олиш, шахмат-шашка, спорт-соғломлаштириш, тиббиёт хоналари, чойхона ташкил этилди. Бой китоб фондига эга кутубхона ҳам фаолият кўрсатмоқда. Вилоятимизда 340 мингдан зиёд нуронийлар истиқомат қилади. Улар давлатимиз эътиборини кундалик ҳаётида ҳис қилиб турибди ва бундан миннатдор.

Айни пайтда катта ҳаётий тажрибага эга фахрийларимиз ижтимоий ҳаётда, айниқса, ёшлар тарбиясида фаол иштирок этмоқда. Барча туман ва шаҳарларда ташкил этилаётган Нуронийлар маскани эса бу борада уларнинг имкониятларидан самарали фойдаланишга хизмат қилади”, — дейди вилоят “Нуроний” жамғармаси раиси Фарҳод Омонов.

Тадбир якунида ишчи-ходимлар ва иштирокчилар учун байрамона дастурхон ёзилиб, концерт дастури намойиш қилинган.