Фарғонада ёшлар ташаббуси билан “Конституция ўзимизники” шиори остида тарғибот тадбири ва концерт-шоу ўтказилди

Фарғона шаҳрида вилоят ёшлари ташаббуси билан “Конституция меники, сеники, бизники! Конституция ўзимизники” шиори остида Конституциявий қонун лойиҳаси бўйича тарғибот тадбири ва концерт-шоу дастури бўлиб ўтди. Бу ҳақда “Дарё” мухбири хабар берди.

Тадбирда олий таълим муассасалари талабалари, вилоятнинг шаҳар ва туманларида яшовчи 2,5 минг нафардан зиёд ёшлар иштирок этди. Албатта, ташаббус ёшларники бўлди, лекин бу давранинг моҳиятини яна-да чуқурроқ англаган турли ёшдаги фарғоналиклар ҳам ўзларини четга тортишмади.

Бундан ташқари, тадбирда Фарғона вилоятидаги чет тилларни ўқитишга ихтисослаштирилган давлат умумтаълим мактаб-интернати директори Элеонара Дадажонова, Murad Buildings компанияси асосчиси Мурод Назаров, таниқли спорт усталари қатнашди.

Тадбир давомида Конституцияга киритилаётган янгиликлар тўғрисида, шунингдек, референдум ўтказиш тартиби, унда иштирок этиш бўйича ёшлар ташаббуслари, таклифлари илгари сурилди.

“Яқингача касбимнинг номини айтгани хижолат бўлардим, жамиятда ўқитувчи энг керакcиз аъзосидек бўлиб қолганди, — дейди Фарғона вилоятидаги чет тилларга ихтисослаштирилган давлат умумтаълим мактаб-интернати директори Элеонара Дадажонова.

— Ўқитувчининг обрўси тушган, ҳимоясиз эди. Унга эса ҳамма “хўжайин”! Ҳали қарасанг, ҳокимият кўча супуришга чиқарган, ҳали қарасанг маҳалла ъсветъга ёки газга пул тўламаганларни рўйхатга олдирган, ҳатто ахлатга пул ундириш учун ҳам ўқитувчини юборишарди. Русча ъсносъ сўзини билмайдиган ўқитувчи қолмади.

Ўқитувчиларнинг пахта етиштириш ва йиғим-терим ишларида иштирок этиши ҳақида умуман гапирмасам ҳам бўлар эди. Худога шукур, энди буларни барчасини ёмон тушдек эслаймиз.

Афсуски, бу ишлар фақат ўқитувчиларнинг ўзинигина камситмади. Мана шу ҳимоясиз ўқитувчи, мактабга келганидан кейин ҳам ўқувчиларга дарс беришдан бошқа ҳамма ишни қилган бечора ўқитувчи туфайли бир неча авлоднинг таълим-тарбияси издан чиқди.

Энди Конституциямизнинг 52-моддасида давлат ҳам, жамият ҳам ўқитувчиларнинг шаъни, қадр-қимматини ҳимоя қилиши, уларга ғамхўрлик кўрсатиши зарурлиги ўз аксини топади. Яъни ўқитувчининг меҳнати жамиятимиз ва давлатимизни тараққий топтиришнинг асосий омили эканлиги тан олиняпти.

Бундан буён ҳеч қайси мансабдор ўқитувчиларни камсита олмайди. Ўқитувчи энди ўқитади, илм беради, орзуларга қанот, мақсадларга қатъият бағишлайди”.