Россия Коммунистик партиясидан Самара вилоят думаси депутати Михаил Абдалкин президент Владимир Путиннинг Федерал Мажлисга мурожаатини қулоғига лағмон илган ҳолда томоша қилганди. Мазкур ҳолат юзасидан депутат Россия Қуролли кучларини обрўсизлантиришда айбдор деб топилди. Бу ҳақда “ТАСС” хабар берди.
Депутатнинг адвокати Алексей Лапузиннинг айтишича, Абдалкин 150 минг рубль (1 959 доллар) жаримага тортилган. Ҳимоя томони суд қарори устидан шикоят қилишни режалаштирмоқда, чунки у буни ноқонуний ва асоссиз деб ҳисоблайди. Лапузин бу Россия Конституциясининг инсон ҳуқуқлари ва эркинликлари ҳақидаги 2-боби талабларига жавоб бермаслигини қайд этди.
7 март куни бўлиб ўтган биринчи суд мажлисида Абдалкин Россия Қуролли кучларини обрўсизлантиришда айбини тан олмаган. Депутатга қарши Россия Қуролли кучларини обрўсизлантириш (Маъмурий жавобгарлик тўғрисидаги кодексининг 20.3.3-моддаси 1-қисми) бўйича 2 март куни маъмурий баённома тузилган.
21 февраль куни Россия президенти Владимир Путин Федерал Мажлисга мурожаат билан чиққан. Шу куни Абдалкин ўзининг “VKонтакте” ижтимоий тармоғидаги саҳифасида қулоғига лағмон илиб, президент мурожаатини томоша қилаётган видеоси билан пост жойлаштирган.
Кейинроқ давлат думаси депутати Александр Хинштейн Абдалкиннинг қилмишидан норози бўлиб, уни “ўзини тийиб туришга” чақирган. Бундан ташқари, депутатлар Абдалкинга партия низомида кўзда тутилган жазо чораларини қўллаш ва уни партиядан четлатишни таклиф қилганди.
Изоҳ (0)