Фарғонада собиқ ўқувчилар 3 млрд сўм эвазига мактаб учун янги бино қуриб берди (фото)

Фарғонада собиқ ўқувчилар ўзлари ўқиган мактаб учун янги бино қуриб берди. Бу ҳақда “Дарё” мухбири хабар бермоқда.

Қайд этилишича, 16 март куни вилоятнинг Учкўприк туманидаги 39-умумтаълим мактабининг 220 ўринли янги биноси фойдаланишга топширилган. Эътиборлиси, ушбу янги бино мактабнинг собиқ битирувчилари ташаббуси билан бунёд этилган.

Мазкур мактаб биноси 1974 йилда қурилган бўлиб, 220 ўринга мўлжалланган муассасада 438 нафар ўқувчи икки навбатда таълим олаётган эди.

Мактабнинг 1974 йилда қурилган эски биноси бузилиб, унинг ўрнида қисқа муддатда таълим маскани учун 220 ўринли янги ўқув биноси қад ростлади. Шунингдек, мавжуд 220 ўринли ўқув биноси таъмирланди.

Бундан ташқари, 6 та синф хонаси ҳамда компьютер синфи замонавий мебел ва зарур ўқув жиҳозлари билан таъминланди. Ушбу хайрли ишларни амалга ошириш учун 3 миллиард сўмдан ортиқ маблағ сарфланди.

Янгидан барпо этилган ушбу таълим маскани биноси ўқувчилар, уларнинг ота-оналари, устозлар учун ўзига хос совға бўлди. Бу ерда ўқувчиларнинг замонавий билим олиши учун барча шароит ва имкониятлар муҳайё этилди.

Янги бино фойдаланишга топширилиши натижасида мактабда бир вақтнинг ўзида 440 нафар ўқувчига таълим бериш имконияти яратилди.