Хитой ва Марказий Осиё: сўнгги йиллардаги иқтисодий жараёнлар қандай кечмоқда?

2022 йил якунига кўра, Хитойнинг Марказий Осиё давлатлари билан ташқи савдо айланмаси 70 миллиард долларни ташкил этиб, 2021 йилга нисбатан қарийб 40 фоизга ошган. 

Хитой ва Марказий Осиё ўртасида дипломатик муносабатлар ўрнатилган 30 йил ичида ташқи савдо айланмаси қарийб 100 баробарга кўпайган. 

Сўнгги йилларда Хитой Марказий Осиёнинг бешта давлати учун савдо-иқтисодий жиҳатдан энг муҳим ҳамкорлардан бирига айланган. 

Хитойнинг Марказий Осиёга киритган жами сармояси 2020 йил охирида 40 миллиард долларга баҳоланган. Уларнинг ярмидан кўпи Қозоғистонга йўналтирилган. 

Ўзбекистонга Пекиндан 2018 йилдан бошлаб инвестициялар кескин ошган. Умумий кўрсаткич эса 2021 йил охирига келиб 9 миллиард долларга етган. 2019 йилда Хитой Қирғизистонга жами 301 миллион доллар сармоя киритган.

2022 йилда Ўзбекистонда 9,8 млрд долларлик хорижий инвестициялар ва кредитлар ўзлаштирилган. Бу борада Хитой Россиядан кейин иккинчи ўринни эгаллаган — 1,5 млрд доллар. 

2019—2022 йиллар давомида Хитойнинг мамлакатга энг катта инвестициялари цемент секторига киритилган. Тошкент ва Жиззах вилоятларида қиймати 150 миллион доллардан ортиқ бўлган кўплаб завод лойиҳалари шулар жумласидандир. 

Шунингдек, Қирғизистонга киритилаётган глобал тўғридан-тўғри хорижий инвестицияларнинг деярли 50 фоизи Хитойга тўғри келади. 

Энергетика соҳасидаги ҳамкорлик ҳам Хитой ва Марказий Осиё ўртасидаги алоқаларнинг муҳим элементи ҳисобланади. 

Хитой ва Марказий Осиёнинг бешта давлати ўртасида дипломатик муносабатлар ўрнатилганидан буён Хитой—Марказий Осиё газ қувури, Хитой—Қозоғистон нефть қувури ва Галкиниш (Туркманистон) газ кони каби қатор йирик лойиҳалар биргаликда амалга оширилди. 

Хитой айнан Туркманистондаги йирик энергетика лойиҳаларига катта миқдорда инвестиция киритади.