Наманган вилояти Тўрақўрғон туманида ўзини тўсатдан каналга ташлаган эркак ҳалок бўлди. Бу ҳақда “Бу кун” дастурида хабар берилди.
Хабарга кўра, воқеа Тўрақўрғон тумани “Бекобод” МФЙ ҳудудидан оқиб ўтувчи Шимолий Фарғона канали ҳудудида содир бўлган. Мазкур ҳудудда яқинлари билан кетаётган 1969 йилда туғилган фуқаро номаълум сабабларга кўра ўзини сувга ташлаб юборган. У кўп сув ютиб юбориши оқибатида ҳалок бўлгани аниқланган. Ҳозирда ҳолат юзасидан суриштирув ишлари олиб борилмоқда.
“Қутқарувчилар воқеа жойига етиб борганда каналда бир фуқаронинг оқиб кетаётганини кўришган ва сувга шўнғиб унинг жасадини сувдан олиб чиқиб берган. Ҳозирда ҳуқуқни муҳофаза қилувчи органлар томонидан ҳолат юзасидан терговга қадар суриштирув ишлари амалга оширилмоқда. Шу ўринда ёз фасли яқинлашаётгани сабабли фуқароларимиздан тақиқланган жойларда чўмилмасликни, дарё бўйлари, канал бўйларида фарзандларни назоратсиз қолдирмасликларини сўраб қолардик”, — дейди вилоят фавқулодда вазиятлар бошқармаси матбуот котиби.
Изоҳ (0)