Тошкент вилояти ҳокими Зоир Мирзаевнинг танқидий йиғилишида уч нафар ҳоким тушунтириш хати ёзди, бир нафар ҳоким огоҳлантирилди. Уч нафар ҳоким ўринбосари эса ҳайфсан олди. Бу ҳақда “Дарё”га вилоят ҳокимлиги ахборот хизмати хабар берди.
Таъкидланишича, бугун, 13 март куни Нурафшон шаҳрида Зоир Мирзаев раислигида навбатдаги “Ҳокимлик соати” ўтказилган.
“Ҳокимлик соатида 2023 йилнинг биринчи чораги якуни бўйича бюджет тушумлари бажарилиши, вилоятда деҳқон хўжаликларини ташкил этиш бўйича берилган топшириқлар ижроси, шунингдек, вилоят ҳокимининг ваколатига кирадиган бошқа муҳим масалалар танқидий муҳокама қилинди. Бир қатор масъулларнинг фаолияти кескин танқид қилинди, айримларига нисбатан чора кўрилди, огоҳлантирилди”, — дейди вилоят ҳокимлиги ахборот хизмат раҳбари Беҳзод Қобулов.
Аниқланишича, Қибрай туманида президентнинг 373-сонли қарорига асосан туманда деҳқон хўжаликлари учун ажратилиши белгиланган 30 гектар майдон ҳалигача аукционга чиқарилмаган. Шу сабаб туман ҳокими Мирагзам Мирқосимов огоҳлантирилган. Ҳокимнинг қишлоқ ва сув хўжалиги масалалари бўйича ўринбосари Б.Тўйчиевга эса ҳайфсан интизомий жазоси қўлланилган.
“Янгийўл тумани ҳокимининг қишлоқ ва сув хўжалиги масалалари бўйича ўринбосари Л.Бадаловга нисбатан деҳқон хўжаликлари учун ажратилиши белгиланган 35 гектар ер майдонларини захирага олмаганлиги учун ойлик маошининг 30 фоизи миқдорида жарима интизомий жазо чораси қўллаш бўйича таклиф киритилди. Шунингдек, Чиноз тумани ҳокимининг қишлоқ ва сув хўжалиги масалалари бўйича ўринбосари Ш.Мирсобировга нисбатан деҳқон хўжаликлари учун ажратилиши белгиланган ер майдонларини аукционга чиқарилишини етарли даражада назоратга олмаганлиги учун ҳайфсан интизомий жазо чораси берилди.
Вилоятдаги қабристонлар учун қўшимча ер ажратиш бўйича берилган таклифларга асосан, Вазирлар Маҳкамаси қарори лойиҳасини якунига етказиш топшириғи бажарилмаганлиги учун вилоят ҳокимлигининг тегишли котибияти мудири А.Акрамовга ҳам ҳайфсан берилди. Ўрта Чирчиқ тумани ҳокими Ихтиёр Қосимов, Янгийўл тумани ҳокими Улуғбек Ялгашов, Паркент тумани ҳокими Шоҳрух Шоаҳмедовлар деҳқон хўжаликлари ташкил этиш бўйича қўшимча 100 гектардан ер майдонларини бугунги кунгача ажратиб бермагани юзасидан тушунтириш хати ёзадиган бўлди”, — дейди ҳокимлик масъули.
Зоир Мирзаев топшириқларни бажаришни пайсалга солган раҳбарлар билан муроса қилиб бўлмаслигини қўшимча қилган.
“Халққа ер ажратиб бериш ишларини пайсалга солган раҳбарлар билан муроса қилиб бўлмайди. Бу аҳолининг озиқ-овқат хавфсизлиги ва фаровонлиги билан чамбарчас муҳим тарихий воқеа. Очиғи, бу борадаги ҳужжат ижроси Тошкент вилоятида сўзсиз бажарилди, дейиш ҳам аслида камлик қилади. Биз эҳтиёжлардан келиб чиқиб, яна қўшимча ер ажратишни ўйлашимиз керак. Токи ер оламан, деҳқончилик қиламан, деган аҳоли, биринчи навбатда, ёшларнинг шаштини қайтармайлик”, — деган вилоят раҳбари.
Изоҳ (0)