Ўзбекистонда қурилиш ишлари ҳажми 2022 йилнинг 11 ойлик якунлари бўйича 115,1 триллион сўмга (10,1 миллиард доллар) етди.
Қайд этилишича, сўнгги йилларда Шавкат Мирзиёевнинг қурилиш соҳасини ислоҳ қилиш бўйича 27 та фармон ва қарори, ҳукуматнинг 24 та қарори қабул қилинди.
Бундан ташқари, Ўзбекистонда қурилиш тармоғини модернизация қилиш, жадал ва инновацион ривожлантиришнинг 2021–2025 йилларга мўлжалланган стратегияси ва уни амалга ошириш бўйича йўл харитаси тасдиқланди.
Ўзбекистонда ўтган 5 йил мобайнида шаҳар, шаҳарчалар ва қишлоқ аҳоли пунктлари бўйича жами 1277 та шаҳарсозлик ҳужжати, жумладан, 190 та бош режа, 1087 та қишлоқ (овуллар), маҳалла фуқаролар йиғинларининг бош режа лойиҳалари билан бир вақтда, батафсил режалаштириш лойиҳалари ишлаб чиқилди. Биргина 2022 йилда яна 140 та аҳоли пунктининг меъморий ҳужжати қабул қилинди.
Бу борадаги давлат муҳим ютуқларидан бири сифатида, 2023—2027 йилларга мўлжалланган шаҳар, шаҳарчалар, қишлоқ ва овулларнинг бош режасини ишлаб чиқиш бўйича дастур шакллантирилди. Эндиликда мазкур дастур асосида 19 та шаҳар ва 222 та шаҳарча бош режаси, 184 ҳудуднинг мастер режаси ҳамда 504 та қишлоқнинг бош режасини ишлаб чиқишни мақсад қилган.
Президентнинг 2022 йил 25 октябрдаги “2022—2023 йилларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги қарори қабул қилинди. Бунда жами 5284 маҳалладаги 6007 та ижтимоий соҳа ва инфратузилма объектида қурилиш-таъмирлаш ишларини бажаришни режалаштирилган.
Ўзбекистон архитекторлари Туркия, Япония, Жанубий Корея каби ривожланган давлатлардаги ҳамкасблари билан биргаликда тажриба алмашиб, қурилиш соҳасига доир илғор технологияларни ўзлаштириб келмоқда.
Изоҳ (0)