Сирдарё туманидаги “Қолгансир“ давлат ўрмон ов хўжалиги ер майдонида ёнғин содир бўлгани тўғрисида хабар берилганди. Бош прокуратура матбуот котибининг маълум қилишича, ҳодиса оқибатида ўсимлик дунёсига 167,7 миллион сўм миқдорида зарар етказилган.
Қайд этилишича, 7 март куни оловга эҳтиётсиз муносабатда бўлиш оқибатида Сирдарё туманидаги давлат ўрмон ов хўжалиги ер майдонидаги экинзор, ўрмон, дарахт ва бошқа ўсимликлар ёнган. Натижада ўсимлик дунёсига жами 167,7 миллион сўм зарар етказилган.
Мазкур ҳолат юзасидан Жиноят кодексининг 198-моддаси (Экинзор, ўрмон, дарахтзорларни ёки бошқа ўсимликларни шикастлантириш ёхуд нобуд қилиш) билан жиноят иши қўзғатилган. Сирдарё тумани ИИБ ТБ томонидан тергов ҳаракатлари олиб борилмоқда.
Аввалроқ Табиат ресурслари вазирлиги ёнғиннинг келиб чиқишига “Шоликор” ва “Синдоробод” СИУ ҳудудида фаолият олиб борувчи 35 нафар фермер ва деҳқон хўжаликлари томонидан шолидан бўшаган ер майдонидаги ўсимлик қолдиқлари ёқиб юборилгани сабаб бўлганини маълум қилганди. Вазирликнинг хабарига кўра, ҳудуддаги 311,7 гектар дала ер майдони ёнган. Ёнғин оқибатида ернинг унумдор қатламидаги балл бонитети пасайишига сабаб бўлган ҳолатлар бўйича дастлабки ҳисоб-китоблар қилиниб, 295 миллион 627 минг сўм миқдорида зарар қайд этилган.
Вилоят Фавқулодда вазиятлар бошқармаси баёнотига кўра, ҳудудда тахминан 5 гектар майдонда қуруқ ўт ва қамишлар ёнган.
Изоҳ (0)