Абдулла Ориповнинг ҳаёт ва ижодига бағишланган фильм премерасидан репортаж (фото, видео)

Тошкентдаги Алишер Навоий номли киносаройда Ўзбекистон халқ шоири Абдулла Ориповнинг хотирасига бағишланган фильм премерасининг ёпиқ тақдимоти бўлиб ўтди. “Абулла Орипов” фильми премерасида киноижодкорлар, шоирнинг яқинлари, лойиҳада суратга тушган актёрлар иштирок этди.

Фильмда Абдулла Ориповнинг Қашқадарё вилояти Косон тумани Некўз қишлоғида ўтган ва ижодга илк қадам қўйган болалик йиллари, Тошкент шаҳрида ўтказган талабалик даврлари, ижод намуналарининг илк нашри, унинг шоир бўлиб шаклланишидаги ҳиссиётлари ва туйғулари, шоирга хос севгиси, машҳурликнинг келиши, шоирнинг дарди, алами, қийинчиликлар кўргани, шунга қарамай, ижодидан чекинмагани ва АҚШдаги ҳаётининг сўнгги йиллари ҳақида ҳикоя қилинади.

“Фильмнинг катта премераси 17 мартга мўлжалланган. Ушбу фильм катта экранларга чиққанидан кейин тақдимотда киномедиа клуби аъзоларидан эшитган хулосалар, таклиф ва мулоҳазаларни эътиборга оламиз. Унинг янада мукаммаллашишида бу тақдимотнинг жуда катта ўрни бор, чунки киноижодкорлар буни анъанага айлантиришган. Фильмдан умидимиз катта”, — дейди журналист Шоҳира Ҳамро.

“Абдулла Ориповдек ўзбекнинг ҳақиқий буюк шоири, Ўзбекистон халқ шоири ҳақида фильм олиш жуда катта масъулият. Бундан ташқари, улар Ўзбекистон Республикасининг мадҳияси муаллифи сифатида ёдга олинади. Фильм сценарийсини ёзишда шоирнинг рафиқаси Ҳанифа ая яқиндан ёрдам берди. Бу бизга ҳаққонийликни берди, ҳақиқатан ҳам ўша давр муҳитини яратиш имкониятини берди.

Фильмни суратга олиш жараёнларида Қашқадарёнинг Некўз қишлоғида Абдулла Ориповнинг хонадонида, бундан ташқари, Тошкентда ўндан ортиқ декорациялар қурилди. Шунингдек АҚШда, шоирнинг қизлари яшаган уйда ҳам суратга олиш ишлари бўлди”,  — дейди фильм режиссёри Музаффар Эркинов.

“Суратга олиш жараёнларида ўзига яраша қийинчиликлар ҳам бўлди, совуқ кунларда ҳам, ҳаддан ташқари иссиқ кунларда ҳам ишладик. Дубльларнинг такрорланиш жараёнида ҳам бўлдик. Айтмоқчиманки, буларнинг ҳаммаси ижодий қийинчиликлар, аслида уларни қийинчилик деб ҳам бўлмайди. Мароқли машаққатлар, биз уларда маза қилиб ишлаймиз.

“Бакалаврни битиргандан кейин ўзимга ёққан соҳа бўйича ўқишни жуда истадим, Лондон ва Мумбай вариантлари бор эди, шундан Мумбайни танладим. Ўқишга бордим, имтиҳон топширдим, ундан муваффаққиятли ўтгандан кейин қабул қилиндим. У ерни тугатиб жуда катта дунёқараш, тажриба билан Ўзбекистонга қайтдим.

Нафақат ҳар бир актёр, балки ҳар бир инсон ўз юртининг байроғини чет элга танитишни истайди, бу эса ватанпарвар инсон учун жуда катта бахт ҳисобланади. Агар насибамиз бўлса, келажакда яхши йўлда ҳаракат қиламиз”, — дейди актриса Райҳон Асадова.

Фильмда Абдулла Ориповнинг болалигини ёш актёр Жасурбек Абдуманнопов, катталигини шоир, Абдулла Ориповнинг шогирди Шодмонқул Саломов, кексалигини Ўзбекистонда хизмат кўрсатган артист Қудратилла Бурхонов гавдалантирган. Лойиҳада шоирнинг рафиқаси Ҳанифа образини Райҳон Асадова ва устоз санъаткор Гулчеҳра Жамилова ижро этган. Шунингдек, фильмда Карим Мирҳодиев, Муҳаммадали Абдуқундузов, Саидкомил Умаров ва бошқа кўплаб актёрлар иштирок этган.

“Уларнинг рафиқалари ролини ўйнашда кучли ҳаяжон бўлди. Ҳаёт бўлган инсонни гавдалантириш жуда масъулиятли. Баъзи бир нарсалар уларга ёқмаслиги мумкин, кийимларни ҳам уларникидек қилиб тиктиришга ҳаракат қилдик. Мен жуда ҳам миннатдорман, чунки ундай эмас, бундай эмас деганлари йўқ, ҳар бир ҳаракатимдан мамнун бўлдилар. Уларнинг оиласидаги муҳит жуда ҳам чиройли, бу бизга катта ёрдам берди. Биз ҳам уларнинг оиласида яшагандек бўлдик”, — дейди халқ ардоғидаги актриса Гулчеҳра Жамилова.

Батафсил репортажни қуйида томоша қилишингиз мумкин.