Abdulla Oripovning hayot va ijodiga bag‘ishlangan film premyerasidan reportaj (foto, video)

Toshkentdagi Alisher Navoiy nomli kinosaroyda O‘zbekiston xalq shoiri Abdulla Oripovning xotirasiga bag‘ishlangan film premyerasining yopiq taqdimoti bo‘lib o‘tdi. “Abulla Oripov” filmi premyerasida kinoijodkorlar, shoirning yaqinlari, loyihada suratga tushgan aktyorlar ishtirok etdi.

Filmda Abdulla Oripovning Qashqadaryo viloyati Koson tumani Neko‘z qishlog‘ida o‘tgan va ijodga ilk qadam qo‘ygan bolalik yillari, Toshkent shahrida o‘tkazgan talabalik davrlari, ijod namunalarining ilk nashri, uning shoir bo‘lib shakllanishidagi hissiyotlari va tuyg‘ulari, shoirga xos sevgisi, mashhurlikning kelishi, shoirning dardi, alami, qiyinchiliklar ko‘rgani, shunga qaramay, ijodidan chekinmagani va AQSHdagi hayotining so‘nggi yillari haqida hikoya qilinadi.

“Filmning katta premyerasi 17-martga mo‘ljallangan. Ushbu film katta ekranlarga chiqqanidan keyin taqdimotda kinomedia klubi a’zolaridan eshitgan xulosalar, taklif va mulohazalarni e’tiborga olamiz. Uning yanada mukammallashishida bu taqdimotning juda katta o‘rni bor, chunki kinoijodkorlar buni an’anaga aylantirishgan. Filmdan umidimiz katta”, — deydi jurnalist Shohira Hamro.

“Abdulla Oripovdek o‘zbekning haqiqiy buyuk shoiri, O‘zbekiston xalq shoiri haqida film olish juda katta mas’uliyat. Bundan tashqari, ular O‘zbekiston Respublikasining madhiyasi muallifi sifatida yodga olinadi. Film ssenariysini yozishda shoirning rafiqasi Hanifa aya yaqindan yordam berdi. Bu bizga haqqoniylikni berdi, haqiqatan ham o‘sha davr muhitini yaratish imkoniyatini berdi.

Filmni suratga olish jarayonlarida Qashqadaryoning Neko‘z qishlog‘ida Abdulla Oripovning xonadonida, bundan tashqari, Toshkentda o‘ndan ortiq dekoratsiyalar qurildi. Shuningdek AQSHda, shoirning qizlari yashagan uyda ham suratga olish ishlari bo‘ldi”,  — deydi film rejissori Muzaffar Erkinov.

“Suratga olish jarayonlarida o‘ziga yarasha qiyinchiliklar ham bo‘ldi, sovuq kunlarda ham, haddan tashqari issiq kunlarda ham ishladik. Dubllarning takrorlanish jarayonida ham bo‘ldik. Aytmoqchimanki, bularning hammasi ijodiy qiyinchiliklar, aslida ularni qiyinchilik deb ham bo‘lmaydi. Maroqli mashaqqatlar, biz ularda maza qilib ishlaymiz.

“Bakalavrni bitirgandan keyin o‘zimga yoqqan soha bo‘yicha o‘qishni juda istadim, London va Mumbay variantlari bor edi, shundan Mumbayni tanladim. O‘qishga bordim, imtihon topshirdim, undan muvaffaqqiyatli o‘tgandan keyin qabul qilindim. U yerni tugatib juda katta dunyoqarash, tajriba bilan O‘zbekistonga qaytdim.

Nafaqat har bir aktyor, balki har bir inson o‘z yurtining bayrog‘ini chet elga tanitishni istaydi, bu esa vatanparvar inson uchun juda katta baxt hisoblanadi. Agar nasibamiz bo‘lsa, kelajakda yaxshi yo‘lda harakat qilamiz”, — deydi aktrisa Rayhon Asadova.

Filmda Abdulla Oripovning bolaligini yosh aktyor Jasurbek Abdumannopov, kattaligini shoir, Abdulla Oripovning shogirdi Shodmonqul Salomov, keksaligini O‘zbekistonda xizmat ko‘rsatgan artist Qudratilla Burxonov gavdalantirgan. Loyihada shoirning rafiqasi Hanifa obrazini Rayhon Asadova va ustoz san’atkor Gulchehra Jamilova ijro etgan. Shuningdek, filmda Karim Mirhodiyev, Muhammadali Abduqunduzov, Saidkomil Umarov va boshqa ko‘plab aktyorlar ishtirok etgan.

“Ularning rafiqalari rolini o‘ynashda kuchli hayajon bo‘ldi. Hayot bo‘lgan insonni gavdalantirish juda mas’uliyatli. Ba’zi bir narsalar ularga yoqmasligi mumkin, kiyimlarni ham ularnikidek qilib tiktirishga harakat qildik. Men juda ham minnatdorman, chunki unday emas, bunday emas deganlari yo‘q, har bir harakatimdan mamnun bo‘ldilar. Ularning oilasidagi muhit juda ham chiroyli, bu bizga katta yordam berdi. Biz ham ularning oilasida yashagandek bo‘ldik”, — deydi xalq ardog‘idagi aktrisa Gulchehra Jamilova.

Batafsil reportajni quyida tomosha qilishingiz mumkin.