Президент Шавкат Мирзиёев Қўшилмаслик ҳаракатининг Мулоқот гуруҳи саммитидаги нутқида республикада пандемия сабабли ёшларнинг сифатли таълим олишида муаммолар юзага келганини, улар профессионал билим олишда қийналганини, оқибатда ёшларнинг келажакка бўлган ишончи сусайганини маълум қилди.
“Пандемиянинг салбий таъсирини, биринчи галда, ўсиб келаётган ёшларимиз ҳис қилмоқда, десак, айни ҳақиқат бўлади. Уларнинг сифатли таълим ва профессионал билим олиш, тиббий хизматлардан фойдаланиш ва спорт билан шуғулланиш имкониятлари кескин камаймоқда. Энг ёмони, ёш авлоднинг келгусида ҳаётда ўз муносиб ўрнини топишига бўлган ишончи ва қатъияти сусаймоқда. Шунингдек, минглаб ёшларнинг онгу тафаккурига бузғунчи ва радикал мафкуралар таъсири ҳам тобора кучаймоқда”, — деди президент ёшлар тақдиридан ташвишланаётганини айтар экан.
“Дарё” давлат раҳбарини ташвишлантирган масала юзасидан Мактабгача ва мактаб таълими вазири Ҳилола Умарова билан субатлашишга уринди. Аммо вазирнинг вақти бўлмагач, таълим фидойиларидан бирини суҳбатга чорлаб, президентни ташвишлантираётган муаммонинг ечими ҳақида қизиқди.
“Юртбошимизнинг мазкур нутқини катта қизиқиш билан ўқиб чиқдим, албатта. Дунёда юзага келган пандемия муаммоси, мазкур қиш мавсумидаги аномал совуқ сабаб ўқувчиларимиз онлайн таълим олишга мажбур бўлди. Юзага келган вазиятлар айнан онлайн таълим билан юзма-юз келишимизга сабаб бўлди. Бу борадаги камчиликларимиз эса ўқувчиларнинг таълимдан кўнгли совиб етарли даражада билим ололмаслигига олиб келди”, — дейди суҳбатдош Қашқадарё вилоятининг Миришкор туманидаги 22-мактаб директори Абдунаби Абдиев.
Таълим фидойисининг айтишича, бугунги кун ўқувчилари ахборот технологияларини яхши билгани учун ўқитувчилар ҳам уларнинг талабига жавоб бера оладиган, замон билан ҳамнафас ўқитувчи бўлиши керак.
“Бугунги кун ўқувчилари анойи эмас, улар ахборот технологияларини жуда яхши билади. Шу сабаб бугунги кун ўқитувчилари ҳам ўқувчиларнинг талабидан келиб чиққан ҳолда замон билан ҳамнафас, таъбир жоиз бўлса оёғини қўлига олиб югурадиган ходимлар бўлиши керак”, — дейди мактаб директори.
45 йиллик иш тажрибага эга Абдунаби Абдиевнинг айтишича, айни кунда мактабларда фаолият юритувчи аксарият ўқитувчилар янги, замонавий ахборот технологияларини етарли даражада билмайди.
“Бугун мактабларимиздаги ёши катта, анча вақтдан бери ишлаб келаётган ўқитувчиларнинг аксарияти замонавий технологияларни билмайди, интернетдан унумли фойдалана олмайди. Ўзини синфхонадаги якка ҳоким деб билади. Аслида ўқувчи ўзи бажариб кўрса кўпроқ билим олишини англаб етмайди”, — дейди суҳбатдош муаллим.
Абдунаби Абдиевнинг таъкидлашича, президент ташвишига сабаб бўлган омиллардан яна бири бу — умумтаълим мактабларидаги синфхоналарда ўқувчилар сонининг кўплиги.
“Бугун ёшларнинг етарли даражада билим ололмаётганининг яна бир сабаби синфхонада ўқувчилар сонининг 35-40 нафарга етиб қолгани ҳисобланади. Ўқитувчи 45 дақиқалик дарси давомида 40 нафар ўқувчига мавзу ўтадими, уйга вазифани сўрайдими, қай бирига улгуради? Шунинг учун синфхоналарда ўқувчилар сони 20-25 нафарга камайса, ўқитувчининг ўқувчилар билан ишлаши учун етарли вақти бўлади. Бу масала бўйича нафақат мен, барча таълим фидойилари вазирликка таклиф бериб келади”, — дейди 22-мактаб директори.
Суҳбатдош директорнинг айтишича, мактабнинг юқори синф ўқувчиларига йўналтирилган таълим бўйича таҳсил бериш керак.
“Президентимиз бундан аввалроқ нега мактаб битирувчиларининг ОТМга киришига қараганда репититорлар тайёрлаган ўқувчиларнинг олийгоҳларга кириши яхши, мактабларда нега етарлича билим берилмаяпти деган фикрни ҳам айтганди. Давлатимиз раҳбарининг бу ташвишида ҳам жон бор. Боиси, биз мактабда битирувчи синфларни ҳам 14 та фан билан чалғитяпмиз. Аслида бошланғич ва ўрта таълимда умумтаълим фанлари ҳақида тушунча бериб, битирувчи синфлар учун йўналтирилган таълим тизимига ўтишимиз керак. Йўналтирилган таълим деганда тўртта йўналишни — аниқ, табиий, ижтимоий гуманитар ва хорижий фанларга йўналтириб, битирувчига керакли фанни ўқитишимиз керак. Репититор шу тартибда яъни ўқувчига энг керакли фанни ўқитиб, ўқувчини шунга тайёрлайди”, — дейди Абдунаби Абдиев.
Директорнинг қўшимча қилишича, мактабларда ўқитувчиларга 1000 доллар маош бериш бошлангач, эндиликда ўқитувчиларнинг салоҳияти, шу маошга қай даражада жавоб бера олиши ҳақида бош қотириш керак.
“Бугун мактаблардаги ўқитувчилар икки тоифага ажралиб қолди. Ўқувчига оддий билимни ҳам беролмайдиган бунга салоҳияти етмаётган ўқитувчилар ва ўз устида ишлайдиган, бугун президент айтаётган 1000 долларлик маошга юз фоиз ҳақли бўлган ўқитувчилар. Биз иккинчи тоифадаги ўқитувчилар сонини кўпайтиришимиз ва мактабга келиб-кетиб, ўқувчига билим беролмайдиган, шунчаки тестда таваккал белгилаб қанақадир даража ва сертификатларни олиб, ўзини ва ўқувчиларни алдаб юрган ўқитувчилардан кечишимиз керак. Шундагина президентни ташвишлантираётган муаммоларга ечим топамиз”, — дейди суҳбатдош.
Изоҳ (0)