Украина армияси Бахмутдан “стратегик чекиниши” мумкин

Украина президентининг иқтисодий масалалар бўйича маслаҳатчиси Александр Роднянскийнинг CNN телеканалига айтишича, бир неча ойдан бери шиддатли жанглар кечаётган Донецк вилоятидаги Бахмут шаҳридан украиналик ҳарбийлар “стратегик чекиниш”ни амалга ошириши мумкин.

“Россия ҳозир Бахмутни ўраб олишга уринмоқда ва бунинг учун улар энг сара ‘Вагнер’ бўлинмаларидан фойдаланмоқда, кўринишидан, улар жуда яхши ўқитилган ва катта тажрибага эга. Маълумки, бизнинг армиямиз барча вариантларни кўриб чиқишга интилмоқда. Улар ҳозирча шаҳарни ушлаб турибди, лекин керак бўлса, стратегик орқага чекинади, чунки биз одамларимизнинг барчасини бекордан бекорга қурбон қилмоқчи эмасмиз”, — деди Роднянский. Унинг таъкидлашича, чекиниш ҳақидаги қарор Украина ҳарбийларининг ихтиёрида қолмоқда.

Роднянскийнинг қайд этишича, Бахмутдан ғарбдаги ҳудуд мустаҳкамланган, шунинг учун Украина Қуролли кучлари шаҳардан чекинган тақдирда ҳам, Россия кучлари тезда олдинга силжий олмайди. “Шубҳага ўрин йўқ, бизнинг қарши ҳужумимиз яқин атрофда”, — дея қўшимча қилди у.

Украина мудофаа вазири ўринбосари Анна Маляр 28 февраль куни Бахмутга Украина армиясининг қўшимча бўлинмалари юборилганини маълум қилди. Малярнинг таъкидлашича, Бахмутни сақлаб қолиш қарорини “сиёсий мотивларга эга бўлмаган” ҳарбийлар қабул қилган.

Украина президенти Владимир Зеленский ўша куни видеомурожаатида Бахмутда энг оғир жанглар бўлаётганини, Россия томони эса йўқотишларга учраганини айтди. Унга кўра, 23 февралдан 28 февралгача Бахмут яқинида 800 га яқин рус аскари ҳалок бўлган. “Россия умуман одамларнинг ҳисобини олмайди, уларни бизнинг позицияларимизга доимий ҳужумга юборади. Жангларнинг шиддати тобора ортиб бормоқда”, — деди Зеленский.

Охирги ҳафталарда, Bloomberg хабар қилганидек, Украина ҳукумати вакиллари Бахмут борасида фикрини ўзгартира бошлаган. 2 февраль куни Владимир Зеленский Киев Бахмутни рус кучларига таслим қилмаслигини айтганди. Уч ҳафтадан камроқ вақт ўтгач, Зеленский Украина “мантиқан тўғри бўлсагина” шаҳар учун курашишини айтди. “Уни ҳимоя қилиш биз учун муҳим, лекин ҳаммани қурбон қилиш эвазига эмас”, — деди Украина президенти.