Фарғона вилоятининг Бешариқ туманида таваккалчиликка асосланган ўйин ташкил этган шахсга жиноят иши қўзғатилди. Бу ҳақда вилоят ИИБ матбуот хизмати хабар берди.
20 февраль куни туман ИИБ ЖҚБ ходимлари томонидан ўтказилган тезкор тадбир давомида Х.Ю муқаддам Маъмурий жавобгарлик тўғрисидаги кодекснинг 191-моддаси 3-қисми (қимор ва таваккалчиликка асосланган бошқа ўйинларни ташкил этиш ёки ўтказиш учун телекоммуникация тармоқларида, шу жумладан, Интернет жаҳон ахборот тармоғи провайдерлари томонидан хизматлар кўрсатиш ёки хизматлар кўрсатишга кўмаклашиш, тегишли дастурий таъминотдан нусха кўпайтириш, уни кўпайтириш, тарқатиш) билан жавобгарликка тортилганига қарамай, 1XBet букмекерлик компанияси ва МоbCash иловасини телефон аппаратига юклаб олиб, таваккалчиликка асосланган ўйинларни ташкил этиш ва ўтказиш учун моддий манфаат эвазига интернет жаҳон ахборот тармоғи провайдери томонидан пул ўтказиш хизмати билан шуғулланиб келгани аниқланган.
18—19 февраль кунлари у 1XBet букмекерлик компанияси иловаси ва МоbCash иловаси ёрдамида фуқаролар Д.А ҳисоб рақамига 300 минг сўм, Х.М ҳисоб рақамига 135 минг сўм пулларини ўтказган.
Мазкур ҳолат юзасидан Бешариқ тумани ИИБ ҳузуридаги тергов бўлинмаси томонидан Жиноят кодексининг 278-моддаси 4-қисми (қимор ва таваккалчиликка асосланган бошқа ўйинларни ташкил этиш ҳамда ўтказиш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)