Ислом тараққиёт банки Ўзбекистонда мактаблар қуриш ва таъмирлашга маблағ ажратиши режалаштирилмоқда. Бу ҳақда Мактабгача ва мактаб таълими вазирлиги хабар қилди.
Маълум қилинишича, вазирлик раҳбари Ҳилола Умарова Ислом тараққиёт банки Марказий Осиё минтақавий ваколатхонаси таълим шўбаси раҳбари Муҳаммад Мирзаи Каҳаги, Таълим учун глобал ҳамкорлик (GPЕ) ташкилотининг ҳудудий раҳбари Лина Бенете ҳамда UNICEF ташкилотининг Ўзбекистондаги ваколатхонаси раҳбари Мунир Маммедзаде билан учрашди.
Учрашув давомида томонлар Ислом тараққиёт банки томонидан ажратилиши режалаштирилаётган маблағдан фойдаланишда асосий вазифалар ҳамда режаларни белгилаб олди.
Музокаралар натижасига кўра Ислом тараққиёт банки томонидан таъмирталаб мактабларда таъмир ишларини амалга ошириш, янги мактаблар ва спортзаллар қуришга маблағ ажратилишига келишилди. Мазкур соҳа учун GPЕ томонидан ҳам қўшимча маблағ ажратилиши кўзда тутилган.
Маълумот учун, ҳозирги кунда Ўзбекистонда фаолият кўрсатаётган 10 104 та мактаблар жами 5,2 миллион ўқувчи ўрнига эга бўлса-да, амалда ушбу мактабларда 6,3 миллион ўқувчи таҳсил олмоқда.
Ҳозирда таъмирталаб мактаблар сони 1250 тани ташкил этади.
Изоҳ (0)