Соғлиқни сақлаш вазирлиги 2025 йилгача 227 та туғуруқ комплекси, 46 та туманлараро перинатал марказ тўлиқ таъмирланишини маълум қилди.
Хабарга кўра, вазирлик ва Ўзбекистон акушер-гинекологлар ассоциацияси билан ҳамкорликда илмий-амалий конференция бўлиб ўтди. “Акушерлик ва гинекологик амалиётда тиббий ёрдамни стандартлаштиришга замонавий ёндашувлар” мавзусидаги ушбу тадбирда вазирлик ва марказ мутахассислари, соҳага алоқадор тиббиёт муассасалари ходимлари, халқаро экспертлар ҳамда ушбу йўналишда илмий изланишлар олиб бораётган олимлар иштирок этди.
Қайд этилишича, бирламчи тизимда акушер-гинекология хизмати қисқартириб юборилди. Ўз вақтида туманлардаги “Аёллар маслаҳатхонаси” бўлимлари ҳомиладорларнинг бирламчи тизимдаги антенатал кузатувини тўлиқ амалга ошириш имконига эга эди. 2022 йил 1 июлдан бошлаб тиббиёт бригадалари таркибига 3600 та, 2023 йил 1 январдан бошлаб яна қўшимча 4900 та педиатрия ҳамшираси ва доя штатлари ажратилди.
Бундан ташқари, 2022–2025 йилларда 227 та туғуруқ комплекси, 46 та туманлараро перинатал марказни тўлиқ таъмирлаш ва жиҳозлаш учун халқаро молия муассасаларининг грант ва кредит маблағлари жалб қилинади. Анжуманда, шунингдек, “Акушер-гинеколог қўлланмаси” китобининг тақдимоти бўлиб ўтди. Маҳорат дарслари форматидаги машғулотларда эса экстремал шароитларда тиббий ёрдам кўрсатишнинг клиник протоколлари ва алгоритмлари кўриб чиқилди.
Изоҳ (0)