Январь ойида ўзбекистонликлар орасида кўчмас мулк сотиб олишга талаб ошди. Шу билан бирга, иккиламчи бозорда уй-жой нархи 1 фоизга кўтарилди. Бу ҳақда “Дарё”га Иқтисодий тадқиқотлар ва ислоҳотлар маркази хабар бермоқда.
Январда 18 мингта кўчмас мулк олди-сотди битимлари рўйхатга олинди, бу 2022 йил декабрь ойига нисбатан 19,7 фоизга кўпдир.
Энг юқори ўсиш суръатлари Қорақалпоғистонда — 3 баравар, Наманган — 78,3 фоиз ва Сирдарё — 68 фоиз вилоятларида қайд этилди.
2022 йил январь ойига нисбатан уй-жой олди-сотди шартномаларининг сони 2,7 фоизга ошди.
Мутахассисларнинг таъкидлашича, кўчмас мулк бозорини қўллаб-қувватлашнинг асосий воситаси имтиёзли ва субсидияланган ипотека кредитлари, шунингдек, давлат дастурларини рағбатлантиришга эътибор қаратилмоқда.
Хусусан, президент Шавкат Мирзиёев ўтган йилнинг декабрь ойида эҳтиёжманд ёш оилалар учун “Менинг биринчи уйим” ипотека дастури мақбул шартлар асосида ишга туширилганини маълум қилган эди. Дастур Тошкент вилоятидан бошланади.
Марказий банк прогнозига кўра, ипотека кредитлашнинг юқори ставкалари 2023 йилда Ўзбекистонда кўчмас мулк бозори ўсишининг асосий омили бўлади.
2022 йил якунларига кўра, банклар томонидан аҳолига берилган ипотека кредитлари ҳажми 1,5 бараварга ошди — 9,8 трлн сўмдан 14,4 трлн сўмга.
Шу билан бирга, бирламчи ва иккиламчи бозорларнинг ўсиши ҳам 1,5 баравар — 7,4 трлн сўмдан 10,8 трлн сўмга ва мос равишда 2,4 трлн сўмдан 3,6 трлн сўмга етди.
Изоҳ (0)