Украинада 185 минг квадрат километр ҳудудни миналардан тозалаш керак, дея маълум қилди Фавқулодда вазиятлар давлат хизмати бошқармаси бошлиғи Олег Бондар. Ушбу майдонни Беларусь ҳудудига (207,6 минг квадрат километр) қиёслаш мумкин.
«Айни пайтда жанговар ҳаракатларни олиб бориш хусусиятини тадқиқ қилиш, чуқур таҳлил бўйича катта чора-тадбирлар шарофати билан потенциал хавфли ҳудудни 300 минг кв. км.дан 185 минг кв. км.гача қисқартиришга муваффақ бўлдик», — деди у.
Ҳарбий ҳаракатлар бошидан буён жами 70 минг гектар майдонга эга ҳудуд текшириб чиқилган ва 192 мингдан ортиқ портлаш хавфига эга буюмлар, шу жумладан, 2,1 мингдан зиёд авиабомбалар аниқланган.
Июль охирида ҳукумат Украинанинг қарийб 212 минг кв. км ҳудуди миналардан тозаланиши кераклигини маълум қилганди.
Август бошида АҚШ Давлат департаменти Украинага миналардан тозалашда ва портламай қолган снарядларни зарарсизлантиришда ёрдам бериш учун 89 миллион доллар тақдим этишини эълон қилганди. Ушбу маблағ ҳисобига, хусусан, 100 та сапёрлар гуруҳи тайёрлантирилади. Британия Мудофаа вазирлиги эса миналарни қидириш ва қирғоқ чизиғини миналардан тозалаш учун Киевга олтита сувости дрони тақдим этишини хабар берганди. Дронлар қирғоққа яқин ҳудудларда 100 метргача чуқурликда фойдаланиш учун мўлжалланган.
Россиянинг АҚШдаги элчиси Анатолий Антонов Америка томони Украина ҳудудига миналар жойлаштиришда Россияни айблаганини айтганди; Москва эса бундай айбловни рад этмоқда.
Изоҳ (0)