Украина президенти Владимир Зеленский Россиянинг босқини бошланганидан бери дастлабки икки ойни СССР давридан қолган бункерда ўтказди, унда ёруғлик ҳам йўқ эди. Бу ҳақда The Sunday Times хабар берди.
Журналистларнинг сўзларига кўра, Зеленский ўзининг энг яқин шериклари билан бирга бу даврда деярли бункердан ташқарига чиқмаган. Совет даврида ишлаб чиқилган ва қурилган бункер одамларни ҳатто тўғридан тўғри ядро зарбасидан ҳам ҳимоя қила олади.
Аввалига Украина президенти ва унинг ҳамроҳлари Россиянинг босқиндан сўнг бошпанада бир неча кун қолиши тахмин қилинган. Бироқ Зеленскийнинг ўзи хавфсизлик чораларини кенгайтиришни талаб қилган ва Россия-Украина урушида деярли икки ой давомида панада бўлган.
“Зеленский ва унинг катта ёрдамчилари икки ой давомида ер остида бўлган ва вақти-вақти билан ҳеч қаерга кетмаганини кўрсатиш учун бункердан ташқарига чиқиб турган”, — дейилади хабарда.
Бункерга тушишга рухсат берилган The Sunday Times мухбирининг айтишича, у ер бутунлай қоронғи. Бункердаги ягона ёруғлик манбайи уларнинг йўлини ёритиб турувчи қўриқчи фонаридир. У ерда уяли телефонлардан ҳам фойдаланишга рухсат берилмайди.
Бундан ташқари, Украина президенти қўриқчилари юқори хавфсизлик чораларини ишлаб чиққан. Зеленскийга яқин бўлган барча одамлар ошкор этилмайдиган ҳужжатларга имзо чеккан. Уларга бункерда содир бўлган барча нарса ҳақида гапириш тақиқланган ва қандай овқат еганларини айтишга рухсат берилмаган.
Изоҳ (0)